धक्कादायक! सासूच्या पाया पडण्यासाठी पर्स बाजूला ठेवली अन् चोरटयाने लांबविली

पंचवटी - औरंगाबादहून लग्न सोहळ्यासाठी नाशिकला आलेली महिला लग्नाच्या हॉलमध्ये पोहोचल्यानंतर समोरून आलेल्या मावस सासूच्या पाया पडण्यासाठी बाजूच्या खुर्चीवर ठेवलेली पर्स अवघ्या काही सेकंदात चोरट्याने लांबविली आणि महिलेचा जवळपास चार लाखांचा ऐवज चोरीस गेला.

घटना औरंगाबाद महामार्गावरील एका लग्न सोहळ्यातील आहे. औरंगाबाद येथून लग्न सोहळ्यासाठी आलेल्या महिलेची चार लाख रुपये किमतीचेे दहा तोळे असलेली सोन्याचे दागिने ठेवलेली बॅग चेारट्याने भरदिवसा मंगल कार्यालयातून लांबविल्याची घटना काल बुधवारी चार वाजता घडली आहे. या चोरीप्रकरणी औरंगाबाद जिल्ह्यातील इटखेडा पैठण रोड येथे राहणाऱ्या मनीषा उमेश सोनवणे यांनी पंचवटी पोलीस ठाण्यात तक्रार दाखल केली असून याबाबत पंचवटी पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे.

सोनवणे या दुपारी चार वाजेच्या दरम्यान मुंबई-आग्रा महामार्गावर असलेल्या एका मंगल कार्यालयात विवाह सोहळ्याला आल्या होत्या. त्याचवेळी कार्यालयात त्यांच्या नातेवाईक असलेल्या मावस सासूच्या पाया पडण्यासाठी त्यांनी त्यांच्याजवळील दागिन्यांची बॅग खुर्चीवर ठेवत पाया पडत असताना चोरट्याने खुर्चीवर ठेवलेली दागिन्यांची बॅग लांबविली.

या बॅगेत तीन पदरी सोन्याचा हार, सोन्याचे गंठण, कानातील टॉप्स, सोन्याचा वेढा, विवो कंपनीचा मोबाईल फोन तसेच २० हजार रुपये रोख असा चार लाख पाच हजार रुपयांचा मुद्देमाल चोरून नेला.