येवल्यात वाहतूक कोंडी

पोलिसांचे दुर्लक्ष : विंचूर चौफुलीवर सिग्नल यंत्रणेची गरज

येवला : स्वच्छ शहर, सुंदर शहर, येवला शहर ही संकल्पना कागदावरच राहिली आहे. पण वाहतूक कोंडीचे शहर म्हणून ओळख व्हायला सुरुवात झाली आहे. येथील नगर-मनमाड रस्त्यावर येवला-विंचूर चौफुलीसह फत्तेबुरुज नाका, गंगा दरवाजा भागात चौफुलीवर सध्या कायम वाहतूक कोंडी होत आहे.
येथे अभावानेच पोलीस आढळतात. नगर-मनमाड राजमार्गावर येवला-विंचूर चौफुली या भागातून शहरात येण्यासाठी असलेला मार्ग सध्या सर्व्हे नंबर ३८०७ व ३९०९ या भागात गेल्या साडेतीन वर्षांपासून शॉपिंग सेंटरचे काम चालू असल्याने या भागातून शहराचा संपर्कअनेकदा बंद असतो. त्याला पर्यायी मार्ग म्हणून लक्कडकोट देवी मार्गापासून वाहतूक वळविण्यात आली आहे. येवला-विंचूर चौफुली भागातून नाशिक, नगर, औरंगाबाद, धुळे या चारही जिल्ह्यातील वाहने जात असतात. सध्या तर मोठ्या प्रमाणात वाहतूक वाढली आहे. नगर व औरंगाबाद येथून नाशिकला जाणारी वाहने जाताना वाहनचालकांना शहरात लावलेल्या अभिनंदनाच्या फलकांचा अडथळा होत असल्याने नाशिक रस्त्याकडे कसे वळावे हेच समजत नाही. प्रवासी आणि माल वाहतूक करणाऱ्या गाड्या येथे उभ्या राहतात. अनेकदा मोठ्या गाड्यांना वळणदेखील घेता येत नाही. त्यामुळे अपघात होण्याची शक्यता अधिक आहे.
शहरातील तीनही चौफुलींवर वाहतूक पोलीस २४ तास आवश्यक आहे. येथे पोलीस चौकी असून नसल्यासारखी आहे. येवला-विंचूर चौफुलीवर वाहनचालकांना खाली उतरून वाहतुकीचे नियमन करावे लागते. वास्तविक पाहता येवला-विंचूर चौफुलीवर वाहतूक सिग्नलची अत्यंत आवश्यकता आहे. चौफुलीवर मध्यभागी पोलिसांना वाहतुकीचे नियमन करण्यासाठी शेड नाही. त्यामुळे पोलीसदेखील याठिकाणी वाहतूक नियमनासाठी उभे राहू शकत नाही. या साऱ्या वाहतुकीच्या कोंडीतून व अडथळ्यांमधून येवलेकरांची सुटका कोण करील? असा प्रश्न उपस्थित केला जात आहे. शहराबाहेरून बायपास काढण्याच्या हालचाली झाल्यात, परंतु येवल्यात अडथळा आणणारे कमी नाहीत. तांत्रिक मुद्दे उपस्थित करून एखादे काम कसे लांबणीवर टाकायचे याबाबत माहीर असणाऱ्या काही धुरिणांनी हे काम लांबवले आहे. केवळ रास्ता रोकोसाठी वापरल्या जाणाऱ्या येवला-विंचूर चौफुलीवर राजकीय धुरिणांनी लक्ष घालून वाहतूक सिग्नल द्यावेत. शहरातील येवला-मनमाड महामार्गावरून पारेगावकडे जाणाऱ्या रस्त्यावर सिग्नलची अत्यंत गरज आहे. गंगादरवाजा व फत्तेबुरुज नाका या भागात सुमारे १० ते १२ हजार शालेय व महाविद्यालयीन विद्यार्थी ये-जा करीत असतात. येथे वाहतूक नियमन करण्यासाठी पोलीस नसतात. अपुरा पोलीस कर्मचारी वर्ग यामुळे या भागात पोलीस नसतात अशी माहिती आहे. रोडरोमिओदेखील बेताल पद्धतीने गाडीचे हॉर्न वाजवत भरधाव चालवत असतात. (वार्ताहर)