दुसऱ्या पत्नीसह दोन मुलींना विष पाजून ठार मारण्याचा प्रयत्न

दुसऱ्या पत्नीसह दोन मुलींना विष पाजून ठार मारण्याचा प्रयत्न

 मालेगाव : आयशानगर भागात आपल्या पहिल्या पत्नीसह राहणाऱ्या शेख गफूर शेख सांडू व त्याच्या तीन अनोळखी साथीदारांनी दुसरी पत्नी हलीमा गफूर शेख (३९) हिच्या द्यानेतील राहत्या घरात प्रवेश करून तिला व तिच्या दोन मुलींना बळजबरीने विषारी औषध पाजून जिवे ठार मारण्याचा प्रयत्न केला. शुक्रवारी पहाटे ४ वाजेच्या सुमारास ही घटना घडली. हलीमा शेख यांनी रमजानपुरा पोलीस ठाण्यात फिर्याद दिली. पती गफूर शेख व तिच्यात महिन्यापासून घराचा वाद आहे. त्यामुळे तो पहिल्या पत्नीकडे राहतो. काल पहाटे दोन मुली व दोन मुलांसमवेत सदर महिला आपल्या घरात झोपली असताना गफूर शेख याने त्याच्या तीन साथीदारांसह घरात प्रवेश करून तिला व तिच्या मुलींना शिवीगाळ करुन बळजबरीने विषारी औषध पाजून जिवे ठार मारण्याचा प्रयत्न केला, असे फिर्यादीत म्हटले आहे.