रिक्षातून मोबाइल चोरी करणारे दोघे जेरबंद

नाशिक : शहर पोलिसांच्या मध्यवर्ती गुन्हे शाखेने शुक्रवारी (दि. २२) कारवाईत मोबाइल चोरी करणाऱ्या रिक्षाचालक व त्याचा साथीदार अशा दोघांना अटक करण्यात आली आहे. मध्यवर्ती गुन्हे शाखेचे पोलीस हवालदार गंगाधर शंकर केदार यांना मिळालेल्या गोपनीय माहितीच्या आधारे ही कारवाई करण्यात आल्याची माहिती पोलिसांनी दिली.

सातपूर गाव मार्केट ते आयटीआय सिग्नल दरम्यान काही दिवसांपूर्वी रिक्षाने प्रवास करणाऱ्या प्रवाशांचे मोबाइल चोरीचे प्रकार घडले असून त्याबाबत शहरातील वेगवेगळ्या पोलीस ठाण्यांत गुन्हेही दाखल आहेत. या मोबाइल चोरट्यांच्या मागावर असलेल्या मध्यवर्ती गुन्हे शाखेला संबंधित संशयित रिक्षाचालक व त्याचा साथीदार चोरीचा मोबाइल विक्री करण्यासाठी ठक्कर बाजार, सीबीएस येथे येणार असल्याची गोपनीय माहिती मिळाली होती. या माहितीच्या आधारे पोलिसांनी तत्काळ कारवाई करीत सापळा रचून संशयित भोलानाथ सीताराम साळवे (२०, रा. गंजमाळ, भद्रकाली) व अभिषेक रमेश हिरे (२०, रा. श्रमिकनगर, सातपूर) यांच्याकडे गुन्ह्यातील चोरीला गेलेल्या मोबाइलसह दोन्ही संशयितांकडे चोरीचे एकूण ८ मोबाइल फोन मिळून आले. दोघांनीही मोबाइल चोरी केल्याची कबुली दिल्याने त्यांना सातपूर पोलीस ठाण्याकडे हस्तांतरित करण्यात आल्याची माहिती मध्यवर्ती गुन्हे शाखेने दिली आहे.