दुचाकीवरील संशयितांनी मोबाइल खेचला

ठळक मुद्देदुचाकीवरील संशयित ; जबरी चोरीचा गुन्हा दाखल

नाशिक : मोबाइलवर बोलत पायी जात असलेल्या इसमाच्या हातातील मोबाइल दुचाकीवरील संशयितांनी खेचून नेल्याची घटना शनिवारी (दि़११) रात्रीच्या सुमारास पाथर्डी रोडवर घडली़

पाथर्डी रोड परिसरातील रहिवासी निवृत्ती बोडके (३९, रा़ सोहम प्लाझा) हे रात्री सव्वा दहा वाजेच्या सुमारास घराजवळून मोबाइलवर बोलत पायी जात होते़ यावेळी पाठीमागून दुचाकीवर आलेल्या संशयिताने बोडके यांच्या हातातील १७ हजार रुपयांचा महागडा फोन खेचून नेला़ या परिसरात चेनस्नॅचिंगबरोबरच मोबाइल खेचण्याच्या घटनांमध्ये वाढ झाली असून, या चोरट्यांचा बंदोबस्त करण्याची मागणी नागरिकांनी केली आहे़

या प्रकरणी इंदिरानगर पोलीस ठाण्यात जबरी चोरीचा गुन्हा दाखल करण्यात आला आहे.

देवळाली कॅम्पमध्ये एकास जबर मारहाण
नाशिक : मित्रासमवेत फिरत असलेल्या तरुणास तिघांनी कुरापत काढून जबर मारहाण केल्याची घटना देवळालीगाव स्मशानभूमी परिसरात शनिवारी (दि़११) सायंकाळच्या सुमारास घडली़ देवळालीतील सोमवार बाजार परिसरातील रहिवासी साजन मुनेश मेहरोलिया हा सायंकाळी साडेपाच वाजेच्या सुमारास मित्र आदित्यसह स्मशानभूमी परिसरात फिरत होता़ यावेळी संशयित जयराम, सौरभ व कुमार लोंढे यांनी मेहरोलियास कुरापत काढून शिवीगाळ केली. यानंतर संशयित सौरभ याने धारदार हत्याराने या दोघांवर वार केले़ या प्रकरणी उपनगर पोलीस ठाण्यात गुन्हा दाखल करण्यात आला आहे.

दुचाकीची चोरी
नाशिक : सिडकोतील उपेंद्रनगरमधील भ्रुणेश कुलकर्णी (रा़ एमआयजी बिल्डिंग) यांची ५० हजार रुपये किमतीची शाईन दुचाकी (एमएच १९, सीके ४९९८) चोरट्यांनी सिटी सेंटर मॉलच्या मागील बाजूकडील मंदिराशेजारील पोलजवळून चोरून नेली़ या प्रकरणी गंगापूर पोलीस ठाण्यात दुचाकी चोरीचा गुन्हा दाखल करण्यात आला आहे.