‘ई-पॉस’च्या वापराने वाढणार कोरोनाचा धोका; म्हणून दुकानदारांचा नकार

गेल्या वर्षभराच्या काळात कोरोनामुळे राज्यात अनेक रेशनदुकानदारांचा बळी गेला असून, अनेकांना कोरोनावर उपचार करण्यासाठी लाखो रुपयांचा खर्च उचलावा लागला आहे. त्यामुळे कोरोनाचे पूर्णपणे निर्मूलन होईस्तोवर ‘ई-पॉस’ यंत्राचा वापर करू नये, अशी आग्रही मागणी रेशन दुकानदार संघटनेने शासनाकडे केली आहे. ई-पॉस यंत्राचा वापर केल्यास त्यावर प्रत्येकाचे बोटाचे ठसे घेतले जातील व त्यातून कोरोना वाढण्यास मदत होईल, असे दुकानदारांचे म्हणणे आहे. आरोग्य खात्याच्या मते कोरोनाचा प्रादुर्भाव वाढण्यास एकमेकांचा स्पर्शदेखील तितकाच कारणीभूत असल्याचा निष्कर्ष काढण्यात आला आहे.

------------------

रेशन दुकानांवर सॅनिटायझर कोण पुरविणार?

१) रेशनवर धान्य वाटप करताना वापरण्यात येणाऱ्या ई-पॉस यंत्राचा वापर सरकारने अनिवार्य केल्यामुळे प्रत्येक शिधापत्रिकाधारकाच्या वापरानंतर यंत्राची स्वच्छता करणे बंधनकारक आहे.

२) शासनाने आदेश दिले असले, तरी यंत्राची स्वच्छता व रेशन घेण्यासाठी येणाऱ्यांच्या सुरक्षिततेची कोणतीही उपाययोजना शासनाने केलेली नाही.

३) ई-पॉस यंत्राला प्रत्येक वेळी सॅनिटाइझ करण्यासाठी सामग्री कोण पुरविणार, हा कळीचा प्रश्न आहे. रेशन दुकानदार हा खर्च पेलण्यास तयार नाहीत.

--------------

रेशन दुकानदारांच्या अशा आहेत मागण्या

१) शासनाच्या अन्न सुरक्षा योजनेची अंमलबजावणी करणाऱ्या रेशन दुकानदारांनाही कोरोना योद्धा म्हणून गणले जावे व त्यांना विम्याचे संरक्षण मिळावे.

२) दुकानदारास कोरोना झाल्यास त्याला शासकीय रुग्णालयातून मोफत औषधोपचार केला जावा.

३) दुकानदाराचा मृत्यू झाल्यास त्याला ५० लाख रुपयांची आर्थिक मदत मिळावी.

-----------

लाभार्थ्यांची गैरसोय कायम

शासनाचे आदेश व रेशन दुकानदारांच्या मागण्यांमुळे संप करण्याचा दिलेला इशारा पाहता, लाभार्थ्यांना वेळेवर धान्य मिळेल काय, हाच प्रश्न समोर उभा राहिला आहे.

-----------------------

एकूण रेशनकार्डधारकांची संख्या- १३, ५७, ३८६

अंत्योदय- १,८१,५९४

केशरी- ४,८३,९३७,

प्राधान्य कुटुंब- ६,९१,८५५

-----------

धान्य वितरण नियमित होईल

जिल्ह्यातील लाभार्थ्यांसाठी आवश्यक असलेला धान्याचा साठा उपलब्ध आहे. मे व जून महिन्यात त्याचे वाटप केले जाणार असल्याने मे महिन्यात त्याचे वाटप सुरू होईल.

- कैलास पवार, सहायक पुरवठा अधिकारी