चांदवड तालुक्यातील गावांना सहा टॅँकरने पाणीपुरवठा

चांदवड : तालुक्यात अल्प पर्जन्यवृष्टी झाल्याने सध्या पाणीटंचाईचा प्रश्न जनतेला भेडसावत आहे. उन्हाळ्यात दरवर्षी टॅँकरची मागणी वाढत असते. यंदा मात्र नऊ गावे व दहा वाड्यांना सहा टॅँकरने पाणीपुरवठा होत असल्याची माहिती प्रांताधिकारी सिद्धार्थ भंडारे, तहसीलदार प्रदीप पाटील, पाणीपुरवठा विभागाचे सी. पी. मोरे, सोमनाथ भोसले यांनी दिली.

पाणीटंचाई असलेल्या हिरापूर, बोपाणे, कळमदरे, परसूल, उसवाड, नांदुरटेक, देवरगाव, भोयेगाव, जोपूळ या नऊ गावांना तर हिरापूरची धनगरवाडी, तळेगाव रोहीची दत्तवाडी, बजरंगनगर, घुमरे वस्ती, काजीसांगवीची दुर्गानगर, नांदुरटेकची चिंचबारी, शिंगवेचे झाल्टे व मढे वस्ती, रामवाडी, खताळ वस्ती, शिंदे व खताळ वस्ती, भाटगावची माळीवस्ती या दहा वाड्यांना टँकरच्या दोन खेपा तर काही गावांना टँकरची एक खेप तसेच काही गावानां दिवसाआड पाणीपुरवठा केला जात असल्याचे पाणीपुरवठा विभागामार्फत सांगण्यात आले. दोन वर्षापूर्र्वी जून ते जुलै महिन्यापर्यंत या भागात पाणीटंचाई असल्याने टॅँकरने पाणीपुरवठा करावा लागला होता. यंदा पाणीटंचाई भीषण असल्याचे चित्र ग्रामीण भागात दिसून येत आहे.