पेठरोड मार्गाच्या कॉँक्रिटीकरणाचा घाट

अंदाजपत्रकात तरतूद नसताना सुमारे अडीचशे कोटी रुपये खर्चून रस्त्यांचे डांबरीकरण व कॉँक्रिटीकरणाचा घाट घालणाºया सत्ताधारी भाजपाला स्वपक्षातीलच नगरसेवक कमलेश बोडके यांनी घरचा अहेर दिला असून, पंचवटीतील सुस्थितीतील पेठरोडचे कॉँक्रिटीकरण करण्यामागचे गौडबंगाल काय, असा सवाल उपस्थित केला आहे.

नाशिक : अंदाजपत्रकात तरतूद नसताना सुमारे अडीचशे कोटी रुपये खर्चून रस्त्यांचे डांबरीकरण व कॉँक्रिटीकरणाचा घाट घालणाºया सत्ताधारी भाजपाला स्वपक्षातीलच नगरसेवक कमलेश बोडके यांनी घरचा अहेर दिला असून, पंचवटीतील सुस्थितीतील पेठरोडचे कॉँक्रिटीकरण करण्यामागचे गौडबंगाल काय, असा सवाल उपस्थित केला आहे. प्रशासनातील अधिकाºयांनी केलेल्या खोट्या सर्वेक्षणाबद्दलही बोडके यांनी आयुक्तांना पत्र लिहून आक्षेप घेतला आहे.
सत्ताधारी भाजपासह प्रशासनाने २५६ कोटी रुपयांच्या रस्ते बांधणीचा घाट घातला आहे. त्यात पंचवटीतील प्रभाग क्रमांक ५ मधील पेठरोडवरील अर्ध्या कि.मी. मार्गासाठी ७.५० कोटी रुपये प्रस्तावित केले आहे. महापालिकेच्या बांधकाम विभागाच्या या अजब कारभाराचे दर्शन घडवणाºया प्रकाराला आता प्रभागातील सत्ताधारी भाजपाचे नगरसेवक कमलेश बोडके यांनीच लेखी पत्राद्वारे आक्षेप घेतला आहे. बोडके यांनी म्हटले आहे, प्रभागातील दत्तनगर, शनिमंदिर परिसर, नवनाथनगर, सुदर्शन कॉलनी, काळाराम मंदिर तसेच सुकेणकर लेन परिसरातील अंतर्गत रस्ते खराब झालेले असताना प्रशासनाकडून मात्र सुस्थितीत असलेल्या पेठरोडच्या कॉँक्रिटीकरणाचा घाट घातला जात आहे. सिंहस्थ काळातच सदर रस्ता पाच ते सहा कोटी रुपये खर्चून अतिशय चांगला करण्यात आलेला आहे. आता पुन्हा त्यावर जनतेच्या पैशांची उधळपट्टी कशासाठी? सदर रस्त्याच्या कामाला विरोध नाही, परंतु सुस्थितीतील रस्ता फोडून तो कॉँक्रिटीकरणाला आक्षेप आहे. सदरचा रस्ता खराब झाल्यानंतरच पुढे अंदाजपत्रकात तरतूद करत रस्त्याचे काम करण्यात यावे. केवळ अर्धाच कि.मी. रस्ता करण्यामुळे खोदकामाने नागरिक व वाहनांना येण्या-जाण्यास मोठा त्रास सहन करावा लागणार आहे. त्यामुळे पेठरोडचे काम न करता त्याऐवजी प्रभागातील नगरसेवकांना विश्वासात घेऊन अन्य रस्त्यांचा सर्व्हे करून अंतर्गत रस्ते पक्के करण्यात यावे, अशी सूचनाही बोडके यांनी केली आहे.
सर्वेक्षणावर प्रश्नचिन्ह
दोन महिन्यांपूर्वी रस्त्यांचा सर्व्हे करूनच २५० कोटींच्या रस्ता बांधणीचा प्रस्ताव महासभेवर ठेवण्यात आल्याचा दावा शहर अभियंता उत्तम पवार यांनी केला आहे. मात्र, सुस्थितीतील पेठरोडवरील अर्ध्या कि.मी. मार्गाकरिता तब्बल ७.५० कोटी रुपये खर्च करण्याच्या प्रस्तावाने बांधकाम विभाग संशयाच्या घेºयात असतानाच आता खुद्द प्रभागातील भाजपा नगरसेवकानेच सर्व्हेची पोलखोल केल्याने बांधकाम विभाग अडचणीत सापडण्याची शक्यता आहे. पेठरोडप्रमाणेच अनेक चांगल्या रस्त्यांवर डांबर ओतले जाण्याची शक्यता असल्याने एकूणच सर्वेक्षणावर प्रश्नचिन्ह निर्माण झाले आहे.