प्रभाग १५ मध्ये प्रतिष्ठेची लढत

प्रभाग १५ मध्ये प्रतिष्ठेची लढत

नाशिक : महापालिकेच्या प्रभाग क्रमांक १५ क मधील शिवसेनेचे उमेदवार सचिन मराठे तसेच भाजपाचे प्रथमेश वसंत गिते यांच्यात लक्षवेधी बिग फाईट होणार आहे. शहरात सर्वत्र चार सदस्यीय प्रभाग असतांना केवळ दोनच प्रभागात तीन सदस्यांसाठी निवडणूक होत आहे. त्यात प्रभाग १५ चा समावेश आहे. यात दोन जागा महिलांसाठी असून एकच जागा खुली असल्याने चुरस आहे. तिसऱ्यांदा निवडणूक रिंगणात असलेले सचिन मराठे यांनी यापूर्वी या प्रभागात राष्ट्रवादीचे माजी शहराध्यक्ष गजानन शेलार यांना पराभूत करून जायंट किलर होण्याचा मान मिळवला आहे.
दुसरीकडे मनसेचे माजी आमदार आणि सध्याचे भाजपाचे प्रदेश उपाध्यक्ष असलेल्या वसंत गिते यांचे चिरंजीव प्रथमेश गिते यांच्याशी त्यांची लढत आहे. गिते हे मूळ शिवसेनेचे असून त्यांनी महापौरपद भूषविले आहे. राजकारणाचा प्रदीर्घ अनुभव आणि प्रचंड जनसंपर्क हे त्यांचे बलस्थान असून निवडणूक रिंगणात प्रथमेश गिते असले तरी प्रत्यक्षात मात्र वसंत गिते विरुद्ध सचिन मराठे अशीच ही लढत रंगण्याची चिन्हे आहेत.