युवा कामगाराची दुचाकी दुभाजकाला धडकली, नाशिकमध्ये मध्यरात्री अपघात

जागरूक नागरिकांनी याबाबत पोलिसांना माहिती कळविल्यानंतर गंगापूर पाेलिस ठाण्यातील शिपाई एस. जी. पवार यांनी तत्काळ १०८ रुग्णवाहिकेला माहिती कळविली.

नाशिक : सातपूर औद्योगिक वसाहतीमधील कारखान्यातील कंपनीत रात्रपाळीसाठी जाणाऱ्या कामगाराची दुचाकी दुभाजकावर आदळल्याने दुचाकीचालक विशाल अभिमान मासूळ-पाटील (२०,रा. डीजीपीनगर-१) याचा दुर्दैवी मृत्यू झाला. ही घटना लवाटेनगर ते एबीबी सर्कलदरम्यानच्या रस्त्यावर घडली.

डीजीपीनगर एक येथील राहत्या घरातून विशाल हा नेहमीप्रमाणे रविवारी (दि. १३) मध्यरात्री दीड वाजेच्या सुमारास दुचाकीने कंपनीत जाण्यासाठी निघाला. त्याची दुचाकी (एमएच १५ बीडब्ल्यू ०७१५) उंटवाडी सिग्नलकडून एबीबीसर्कलच्या दिशेने येताना वळणावर दुभाजकाला जाऊन धडकली. ही धडक इतकी भीषण होती की विशाल गंभीर स्वरुपात जखमी होऊन रक्ताच्या थारोळ्यात पडला.

जागरूक नागरिकांनी याबाबत पोलिसांना माहिती कळविल्यानंतर गंगापूर पाेलिस ठाण्यातील शिपाई एस. जी. पवार यांनी तत्काळ १०८ रुग्णवाहिकेला माहिती कळविली. तसेच उपनिरीक्षक मुंढे, हवालदार रामदास खुळात हे घटनास्थली दाखल झाले. त्यांनी विशाल याला उपचारार्थ जिल्हा शासकिय रुग्णालयात दाखल केले; मात्र तोपर्यंत त्याची प्राणज्योत मालवली होती. वैद्यकिय अधिकारी यांनी तपासून विशाल यास मयत घोषित केले. पुढील तपास हवालदार खुळात हे करत आहेत.