चालक मोबाईल पाहत राहिला अन् ट्रेन गेली प्लॅटफॉर्मवर; मथुरेतील अपघाताचा व्हिडीओ viral

उत्तर प्रदेशातील मथुरा येथे मंगळवारी रेल्वेचा भीषण अपघात झाला. या रेल्वे दुर्घटनेच्या संयुक्त तपास अहवालात चालक रेल्वे चालवताना मोबाईल फोनवर काहीतरी पाहत असल्याचे समोर आले आहे. तसेच तो सौम्य नशेच्या अवस्थेत होता, असेही तपास अहवालात नमूद करण्यात आले आहे. एका हिंदी वेबसाईटने सूत्रांच्या हवाल्याने दिलेल्या माहितीनुसार, चालकाच्या चुकीमुळे ट्रेन प्लॅटफॉर्मवर चढली होती.

माहितीनुसार ही चूक 'क्रू व्हॉईस अँड व्हिडीओ रेकॉर्डिंग सिस्टिम'च्या माध्यमातून उघड झाली. रेल्वे स्थानकावर आल्यानंतर सर्व प्रवासी खाली उतरले, असे त्यात म्हटले आहे. यानंतर रेल्वे कर्मचारी सचिन त्याच्या मोबाईलवर काहीतरी पाहत असताना ट्रेनच्या इंजिनमध्ये पोहोचला. त्याने आपली बॅग इंजिनच्या एक्सलेटरवर ठेवली आणि त्याच्या मोबाईलमध्ये काहीतरी पाहू लागला. बॅगेच्या दाबामुळे एक्सलेटर पुढे सरकले आणि ट्रेन पुढे जाऊ लागली अन् हा अपघात झाला. 

नजर हटी दुर्घटना घटी...#MathuraJunctionpic.twitter.com/7r8HWS8IVG

— Omkar Sankpal_ओमकार संकपाळ (@OmkarSa81701387) September 28, 2023

मंगळवारी घडला विचित्र अपघात
मथुरा जंक्शनवर शकूरबस्ती-नवी दिल्ली-मथुरा शटल ईएमयू ट्रेन प्लॅटफॉर्म क्रमांक दोनवर रुळावरून घसरल्याने मोठा अपघात झाला. सुदैवाने कोणतीही जीवितहानी झाली नाही. इंजिन प्लॅटफार्मवर येताच प्लॅटफार्मवरील प्रवासी पळून गेल्याने कोणतीही जीवितहानी झाली नाही. दरम्यान, ट्रेनमध्ये बसलेले प्रवासी आधीच उतरले होते. मंगळवारी रात्री १०.५५ च्या सुमारास लोको पायलट इंजिन बंद करून ते पार्क करत असताना हा अपघात झाला. या अपघातातील मोठी बाब म्हणजे प्लॅटफॉर्मवर रेल्वे इंजिनच्या प्रवेशापासून काही अंतरावर ओएचई लाईनचा पोल लावण्यात आला होता, त्यामुळे ट्रेनचे इंजिन त्यावर आदळले आणि थांबले. जर ओएचई लाईनचा पोल नसता तर प्लॅटफॉर्मवर ट्रेन किती प्रमाणात धावली असती आणि किती लोकांना त्याचा फटका बसला असता याचा अंदाज लावता आला नसता.