कोलकाता बलात्कार प्रकरणी ८७ दिवसांनी आरोप निश्चित,दररोज सुनावणी होणार
By ऑनलाइन लोकमत | Published: November 4, 2024 09:25 PM2024-11-04T21:25:15+5:302024-11-04T21:26:56+5:30
कोलकाता प्रकरणातील मुख्य आरोपी संजय रॉय विरोधात आरोप निश्चित केले आहेत.
कोलकाता बलात्कार प्रकरणी ८७ दिवसांनी आरोप निश्चित,दररोज सुनावणी होणार
कोलकात्याच्या आरजी कर मेडिकल कॉलेजमध्ये महिला डॉक्टरवर झालेल्या बलात्कार प्रकरणी आरोपी संजय रॉय विरोधात ८७ दिवसांनी स्थानिक न्यायालयाने आरोप निश्चित केले आहेत. ११ नोव्हेंबरपासून या प्रकरणाची दररोज सुनावणी होणार असल्याचे न्यायालयाने जाहीर केले. रॉय याच्यावर भारतीय न्याय संहितेच्या विविध कलमांतर्गत गुन्हा दाखल करण्यात आला आहे.
रॉय याला सियालदह न्यायालयातून बाहेर काढले जात असताना आरोपीने माध्यमांना प्रतिक्रिया दिली. संजय रॉय म्हणाला, “मी काहीही केलेले नाही. मला या बलात्कार-हत्या प्रकरणात गोवण्यात आले आहे. माझे कोणी ऐकत नाही. सरकार मला अडकवत आहे आणि तोंड न उघडण्याची धमकी देत आहे.
कोलकाता पोलिसांनी १० ऑगस्ट रोजी रॉयला अटक केली होती. त्याच्या एक दिवस आधी आरजी कर हॉस्पिटलच्या सेमिनार हॉलमध्ये एका महिला डॉक्टरचा मृतदेह आढळून आला होता, त्यानंतर कोलकाता उच्च न्यायालयाच्या आदेशानुसार केंद्रीय अन्वेषण विभागाने या प्रकरणाचा तपास हाती घेतला होता.
काँग्रेसच्या पश्चिम बंगाल युनिटचे वरिष्ठ नेते अधीर चौधरी म्हणाले की, रॉय याच्या दाव्याची गांभीर्याने दखल घेऊन चौकशी झाली पाहिजे. “आरोपींच्या अशा दाव्यांकडे दुर्लक्ष केले जाऊ नये आणि त्यांची चौकशी केली पाहिजे. असा गुन्हा कोणत्याही एका व्यक्तीकडून शक्य नाही, असे आम्ही म्हणत आलो आहोत. हा सामूहिक गुन्हा आहे. सीबीआय आणि कोलकाता पोलिस यांच्यात गुप्त संबंध आहे की नाही हे आम्हाला माहीत नाही,आम्हाला शंका आहे.
पोलिसांच्या भूमिकेचीही चौकशी झाली पाहिजे, असे मत काँग्रेसचे माजी प्रदेशाध्यक्ष चौधरी यांनी व्यक्त केले. गेल्या महिन्यात दाखल केलेल्या प्राथमिक आरोपपत्रात सीबीआयने रॉय यांना या प्रकरणातील एकमेव मुख्य आरोपी म्हणून वर्णन केले होते. दरम्यान, आरजी कर हॉस्पिटलमधील भ्रष्टाचार प्रकरणाच्या सुनावणीदरम्यान सीबीआयने अलीपूर येथील विशेष न्यायालयात या गुन्ह्यामागे खोल कट असल्याचे सांगितले.
कोलकाता उच्च न्यायालयाने 23 ऑगस्ट रोजी आरजी कार मेडिकल कॉलेज आणि हॉस्पिटलचे माजी प्राचार्य संदीप घोष यांच्या कार्यकाळातील कथित आर्थिक अनियमिततेचा तपास सीबीआयने स्थापन केलेल्या विशेष तपास पथकाकडे (एसआयटी) सोपवण्याचे आदेश दिले होते. राज्य याप्रकरणी घोष यांना अटक करण्यात आली होती.