अरे देवा! पतीने आणल्या 60 प्रकारच्या नेलपॉलिश; सासूने लावताच सून नाराज, ठेवली 'ही' अट

एका सासूने आपल्या सुनेची नेलपॉलिश लावली. सुनेने याला विरोध केला असता कुटुंबीयांमध्ये मोठा वाद झाला.

आग्रामध्ये एक अजब घटना समोर आली आहे. एका सासूने आपल्या सुनेची नेलपॉलिश लावली. सुनेने याला विरोध केला असता कुटुंबीयांमध्ये मोठा वाद झाला. त्यानंतर संतापलेली सून कुटुंबीयांशी भांडण करून माहेरी निघून गेली. तसेच सुनेने पती आणि सासरच्या मंडळींविरोधात हुंड्यासाठी छळ होत असल्याची तक्रार केली होती. याप्रकरणी शनिवारी दोन्ही पक्षांना कौटुंबिक समुपदेशन केंद्रात समुपदेशनासाठी बोलावण्यात आलं होतं. 

महिलेने दिलेल्या माहितीनुसार, समुपदेशनानंतर ती तिच्या पतीसोबत राहण्यास तयार आहे, परंतु तिची एक अट आहे की ती सासूसोबत राहणार नाही. सासू तिचा छळ करत असल्याचं महिलेने सांगितलं. तर दुसरीकडे नवऱ्याने हा वाद केवळ नेलपॉलिश लावण्यावरून झाल्याचं म्हटलं आहे. दोघांनाही पुढील तारखेला बोलावण्यात आलं आहे.

मिळालेल्या माहितीनुसार, रकाबगंज येथील रहिवासी असलेल्या तरुणाचं लग्न शाहगंज भागात राहणाऱ्या तरुणीशी 2021 मध्ये झालं होते. बायकोला नेलपॉलिश लावण्याची आवड आहे. पतीने समुपदेशकाला सांगितलं की, तिच्या या आवडीमुळे त्याने पत्नीसाठी 60 प्रकारच्या नेलपॉलिश विकत घेतल्या होत्या. 

एके दिवशी आईने पत्नीसाठी आलेली नेलपॉलिश तिला न विचारता लावली. या प्रकरणावरून पत्नीने घरात गोंधळ घातला. आईशी भांडू लागली. ही किरकोळ बाब असल्याचं त्याने पत्नीला समजावून सांगितलं. तसेच तिला तो नवीन आणून देईल असंही सांगितलं. आईने नेलपॉलिश लावली तर काय़ झालं? असा प्रश्न विचारला तेव्हा पत्नी नाराज झाली आणि निघून गेली.

महिलेने दिलेल्या माहितीनुसार, पती नेहमीच फक्त आईची बाजू घेतो. त्यामुळे ती माहेरी निघून गेली. तसेच सासूने तिचं जगणं अवघड केलं आहे. सासू वेळोवेळी तिला त्रास देते. टोमणे मारते. त्यामुळे ती तिच्या पतीसोबत राहण्यास तयार आहे पण सासूसोबत राहणार नाही. जर पतीला एकत्र राहायचे असेल तर त्याला वेगळं राहावं लागेल. सध्या या घटनेची सर्वत्र चर्चा रंगली आहे.