हिट अँड रन प्रकरणी सलमानच्या अडचणी वाढल्या, सुप्रीम कोर्टात आणखी एक याचिका

नवी दिल्ली, दि. १३ - हिट अँड रनप्रकरणी उच्च न्यायालयाने जरी सलमान खानची मुक्तता केली असली तरी सलमानच्या गाडीची ठोकर बसून जखमी झालेल्या नियामत शेखने सुप्रीम कोर्टात याचिका दाखल करत उच्च न्यायालयाच्या निर्णयाला आव्हान दिले आहे. २००२ साली वांद्र येथील अमेरिकन एक्सप्रेस बेकरीजवळील अभिनेता सलमान खानच्या लँड क्रूजर गाडीने फूटपाथवर झोपलेल्या ५ जणांना चिरडले होते, त्यात एकाचा बळी गेला तर इतर जखमी झाले. त्या जखमींपैकीच एक असलेल्या शेखने उच्च न्यायालयाच्या निर्णयाला आव्हान देण्यासाठी सर्वोच्च न्यायालयात विशेष याचिका दाखल करत सलमानच्या सुटकेला आक्षेप नोंदवला आहे. याप्रकरणी दाखल करण्यात आलेल्या ठोस पुराव्यांना नजरअंदाज करत हायकोर्टाने सलमानला चुकीच्या पद्धतीने दोषमुक्त केल्याचा आरोपही या याचिकेत करण्यात आला आहे. 

 

काय आहे हे प्रकरण :

२८ सप्टेंबर २००२ हिट अँड रन प्रकरण घडले. सलमानने लँड कु्रझर गाडी भरधाव चालवत वांद्रे येथील अमेरिकन एक्सप्रेस बेकरीजवळील फुटपाथवर चढवली. पदपथावर झोपलेले पाच जण गाडीखाली चिरडले गेले. यातील एकाचा बळी गेला. असा आरोप त्याच्यावर ठेवण्यात आला होता. याप्रकरणी सलमानविरोधात वांद्रे महानगर दंडाधिकारी न्यायालयात भरधाव गाडी चालवण्याचा खटला सुरू होता. मात्र २००३ मध्ये सलमानवर सदोष मनुष्यवधाचा आरोप ठेवण्यात आला व हा खटला सत्र न्यायालयात वर्ग करण्यात आला. याप्रकरणी मुंबई सत्र न्यायालयाने सलमानला दोषी ठरवत त्याला पाच वर्षांची शिक्षा सुनावली होती. त्यानंतर हायकोर्टात जामीन मिळवत सलमानने तुरुंगवारी वाचवली होती. त्यानंतर सबळ पुराव्याअभावी मुंबई उच्च न्यायालयाने १० डिसेंबर २०१५ रोजी त्याला निर्दोष मुक्त केले होते.

 

> सदोष मनुष्यवध  

> भरधाव गाडी चालवणे 

> निष्काळजीपणा 

> गंभीर दुखापत करणे 

> किरकोळ दुखापत करणे