अरविंद केजरीवालांच्या "त्या" नातेवाईकाचं सोमवारीच झालं निधन

दिल्लीचे मुख्यमंत्री यांनी मंत्रीमंडळातून बडतर्फ केल्यापासून कपिल मिश्रा यांनी केजरीवाल आणि आपवर सनसनाटी आरोपांची मालिका सुरू केली आहे.

ऑनलाइन लोकमत

नवी दिल्ली, दि. 9 - दिल्लीचे मुख्यमंत्री अरविंद केजरीवाल यांनी मंत्रीमंडळातून बडतर्फ केल्यापासून कपिल मिश्रा यांनी केजरीवाल आणि आपवर सनसनाटी आरोपांची मालिका सुरू केली आहे. अरविंद केजरीवाल यांनी 2 कोटी रूपयांची लाच घेतली असा आरोप करून त्यांच्याविरोधात जोरदार मोर्चा उघडणाऱ्या कपिल मिश्रा यांनी सोमवारी पुन्हा एकदा केजरीवाल यांच्यावर खळबळजनक आरोप केले. सत्येंद्र जैन यांनी केजरीवाल यांचे साडू सुरेंद्र कुमार बंसल यांच्यासाठी 50 कोटी रुपयांच्या जमिनीचा व्यवहार केला होता, असा आरोप मिश्रा यांनी केला. तसेच सत्येंद्र जैन यांनी केजरीवाल यांना दोन कोटी रुपये दिल्याच्या आरोपाचा पुनरुच्चार करत मंगळवारी(दि.9) सकाळी 11.30 वाजता सीबीआयकडे यासंदर्भातील पुरावे आपण सोपवणार असून, त्याबाबत तक्रार नोंदवणार असल्याचे कपिल मिश्रा यांनी सांगितले. मात्र, ज्या सुरेंद्र कुमार बंसल यांचं नाव कपिल मिश्रांनी घेतलं त्याचं सोमवारीच निधन झालं.

 

दिल्लीतील मेदांत रुग्णालयात ह्रदय विकाराच्या धक्क्याने त्यांच निधन झालं. सोमवारी सकाळी त्यांच्या अंत्यसंस्कारात स्वतः केजरीवालही पोहोचले होते. बंसल आपल्या कुटुंबासह दिल्लीच्या प्रितमपुरा येथे राहात होते. त्यांच्या निधनामुळे दुःखी असलेल्या केजरीवालांचं कुटुंब मिश्रांच्या आरोपांमुळे आणखी  दुखावलं. स्वतः अरविंद केजरीवाल यांच्या पत्नी सुनीता यांनी ट्विट करून आरोप बिनबुडाचे असल्याचं म्हटलं तसंच हा मुर्ख माणूस ज्या व्यक्तीचं आज निधन झालं आहे त्याच्यावर आरोप करत असल्याचं म्हटलं.

My brother in law is no more n this stupid man is speaking all written script without any mind.

— Sunita Kejriwal (@KejriwalSunita) May 8, 2017

 

यानंतर आपच्या अनेक नेत्यांनी मिश्रांवर निशाणा साधला.  कपिल मिश्रा इतक्या खालच्या पातळीवर उतरलेत की ज्या सुरेंद्र कुमार बंसल यांचं आज निधन झालं त्यांच्यावरच असे बिनबुडाचे आरोप लावत आहेत असं ट्विट नेते संजय सिंग यांनी केलं.  

क्या अपनी बौखलाहट में कपिल मिश्रा इतनी भी मर्यादा भूल गये की आज ही अरविंद जी के साढ़ू बंसल जी का निधन हुआ और उन पर ऐसे बेबुनियाद आरोप?

— Sanjay Singh AAP (@SanjayAzadSln) May 8, 2017

पक्षांतर्गत आणि पक्षबाह्य अशा दोन्ही आघाड्यांवर अडचणींचा सामना करणाऱ्या आम आदमी पक्षातील अंतर्गत कलहाने रविवारी पुढचा अंक गाठला होता. दिल्लीत अरविंद केजरीवाल यांच्या मंत्रिमंडळातून हकालपट्टी झालेल्या कपिल मिश्रांनी थेट केजरीवालांना लक्ष्य केले होते. या पार्श्वभूमीवर सोमवारी आम आदमी पक्षाच्या कार्यकारिणीची तातडीची बैठक पार पडली. या बैठकीत कपिल मिश्रांना पक्षातून निलंबीत करण्याचा निर्णय घेण्यात आला. पक्षातून निलंबनाची कारवाई झाली असली तरी त्यांची आमदारकी कायम राहणार आहे. कपिल मिश्रा यांनी रविवारी अरविंद केजरीवाल यांच्यावर गंभीर आरोप केले होते. दिल्लीचे सार्वजनिक बांधकाम मंत्री सत्येंद्र जैन यांच्याकडून केजरीवाल यांनी दोन कोटी रुपये घेतल्याचे मी स्वतःच्या डोळ्यांनी पाहिले आहे असा आरोप करत मिश्रांनी खळबळ उडवून दिली होती. केजरीवाल मंत्रिमंडळात काम करताना अनेक गैरप्रकार आढळून आले. याबाबत मी नायब राज्यपाल अनिल बैजल यांना निवेदन दिल्याचे मिश्रांनी म्हटले होते. केजरीवाल आता पूर्वीसारखे राहिले नसून मुख्यमंत्री पदाने त्यांना बदलले आहे असे मिश्रा यांनी म्हटले होते. आपने कपिल मिश्रांचे आरोप फेटाळून लावत मिश्रा हे भाजपची भाषा बोलत असल्याचा आरोप केला होता. विशेष म्हणजे कपिल मिश्रा यांनी रविवारीच भाजपमध्ये जाणार नाही असे स्पष्ट केले होते. सोमवारीदेखील मिश्रा यांनी आपवर निशाणा साधला होता. केजरीवाल यांच्यावर आरोप केल्यावर मला धमक्यांचे मेसेजेस आणि कॉल येत आहेत. माझी पक्षातून हकालपट्टी करुन दाखवा असे आव्हानच त्यांनी दिले होते. मी भाजप आणि नरेंद्र मोदींचा विरोधक असून मी भाजपची भाषा बोलत असल्याच्या आरोपात तथ्य नाही असे मिश्रांनी स्पष्ट केले होते. मंगळवारी सकाळी सीबीआयकडे तक्रार करणार असून सीबीआयसमोर प्रत्यक्ष साक्षीदारही हजर करु असे मिश्रांनी म्हटले होते.