महिलांबद्दल आक्षेपार्ह विधान करणाऱ्या आझम खान यांनी मागितली माफी

महिलांबद्दल आक्षेपार्ह विधान करणाऱ्या आझम खान यांनी याप्रकरणी सोमवारी (29 जुलै) लोकसभेत दोन वेळा माफी मागितली आहे. 

ठळक मुद्देमहिलांबद्दल आक्षेपार्ह विधान करणाऱ्या आझम खान यांनी याप्रकरणी लोकसभेत दोन वेळा माफी मागितली आहे. आझम खान यांची वर्तवणूक चुकीचीच असल्याचं रमा देवी यांनी म्हटलं आहे. 'आझम खान यांनी माझाच नाही तर देशातील स्त्री-पुरुषांचा अपमान केला आहे' असं रमा देवी यांनी म्हटलं आहे. 

नवी दिल्ली - लोकसभेत तिहेरी तलाक विधेयकावर चर्चा सुरू असताना गुरुवारी (25 जुलै)  समाजवादी पार्टीचे खासदार आझम खान यांनी एक वादग्रस्त वक्तव्य केलं होतं. आझम खान यांनी एक शेर सादर करत त्यांच्या भाषणाची सुरुवात केली. यावेळी लोकसभा अध्यक्षांच्या खुर्चीवर भाजपाच्या खासदार रमा देवी बसल्या होत्या. त्यांच्याकडे पाहत खान यांनी वादग्रस्त विधान केलं. यामुळे लोकसभेत एकच गोंधळ झाला. त्यांच्या या विधानानंतर वाद झाला आहे. महिलांबद्दल आक्षेपार्ह विधान करणाऱ्या आझम खान यांनी सोमवारी (29 जुलै) याप्रकरणी लोकसभेत दोन वेळा माफी मागितली आहे. 

'अध्यक्षांच्या भावना दुखावण्याचा यामागे माझा अजिबात हेतू नव्हता. तरीही माझ्याकडून काही चूक झाली असं त्यांना वाटत असेल तर मी त्याबाबत क्षमा मागतो आहे' असं आझम खान यांनी म्हटलं आहे. तसेच याप्रकरणी आझम खान यांनी सोमवारी लोकसभेत दोन वेळा माफी मागितली आहे. आझम खान यांची वर्तवणूक चुकीचीच असल्याचं रमा देवी यांनी म्हटलं आहे. 'आझम खान यांनी माझाच नाही तर देशातील स्त्री-पुरुषांचा अपमान केला आहे' असं रमा देवी यांनी म्हटलं आहे. 
 

SP Azam Khan in Lok Sabha: Meri aisi koi bhavna Chair ke prati na thi na ho sakti hai. Mere bhashan aur acharan ko sara sadan janta hai, iske bawjood bhi Chair ko aisa lagta hai ki mere se koi galti hui hai toh main uski kshama chahta hun. pic.twitter.com/2lMB07llyQ

— ANI (@ANI) July 29, 2019

तिहेरी तलाकवर चर्चा सुरू असताना रामपूर मतदारसंघातून समाजवादी पार्टीच्या निवडून आलेले आझम खान बोलायला उभे राहिले. त्यांनी ‘तू इधर-उधर की ना बात कर…’ असा शेर म्हणत बोलायला सुरुवात केली. यावेळी त्यांनी लोकसभा अध्यक्षांच्या खुर्चीवर बसलेल्या भाजपाच्या खासदार रमा देवी यांच्याबद्दल वादग्रस्त विधान केलं. 'आप मुझे इतनी लगती है की मेरा मन करता है की आप की आँखो में आँखे डाले रहूँ' असं आझम खान यांनी म्हणताच लोकसभेत गदारोळ झाला. भाजपाच्या खासदारांनी खान यांच्या वक्तव्याचा निषेध केला. यानंतरही खान त्यांच्या विधानावर ठाम राहिले. माझं विधान सदनाच्या कामकाजाच्या दृष्टीनं चुकीचं असल्यास मी राजीनामा द्यायला तयार असल्याचं म्हणत ते सदनातून निघून गेले. 

BJP MP Rama Devi in Lok Sabha: Azam Khan ji's remark has hurt both women and men in India. He will not understand this. Inki aadat bigadi hui hai, zaroorat se zada bigadi hui hai. I have not come here to hear such comments. pic.twitter.com/Z1tvupdNvW

— ANI (@ANI) July 29, 2019

आझम खान यांचं विधान कामकाजातून वगळण्यात यावं असे आदेश यानंतर दिले गेले. विधानसभा, लोकसभा, राज्यसभेच्या कामाकाजाचा प्रदीर्घ अनुभव असलेल्या खान यांनी त्यांच्या विधानाबद्दल त्वरित माफी मागायला हवी, अशी मागणी कायदेमंत्री रवीशंकर प्रसाद यांनी केली. यानंतर लोकसभेचे अध्यक्ष ओम बिर्ला यांनी संसदेचं पावित्र्य प्रत्येकानं जपायला हवं, असं आवाहन केलं. 'संसदेच्या कामकाजातून हे विधान काढा, ते वक्तव्य वगळा, असं म्हणणं सोपं आहे. मात्र अशा मागण्या करण्याची गरजच का भासते? एकदा विधान केल्यावर ते लोकांपर्यंत पोहोचलेलं असतं. त्यामुळे आपण सर्वांनी संसदेचं पावित्र्य जपलं पाहिजे,' असं बिर्ला म्हणाले.

'आझम खान यांचं शीर कापून संसदेच्या दरवाजावर टांगा'

रमा देवी यांच्यावर टिप्पणी करणाऱ्या समाजवादी पक्षाचे नेते आझम खान यांच्यावर भाजपा नेते आफताब अडवाणी यांनी टीका केली होती. आझम खान यांचं शीर कापलं पाहिजे असं वादग्रस्त वक्तव्य अडवणी यांनी केलं होतं 'आझम खान यांचं वक्तव्य निषेधार्ह आहे. आम्ही त्याचा निषेध करतो. आझम खान यांचं शीर कापून संसेदच्या दरवाजाला टांगण्यात यावं. देशात जेव्हा गंभीर समस्येवर चर्चा होते तेव्हा नेहमी आझम खान आणि ओवैसी वाद निर्माण करतात. त्यामुळे महिलांचा अपमान करणाऱ्यांना असं केल्यास काय परिणाम होतात याची जाणीव होईल' असं भाजपा नेते आफताब अडवाणी यांनी म्हटलं होतं. 

आझम खान यांच्या अडचणीत वाढ, आणखी 13 प्रकरणांत चार्जशीट दाखल

समाजवादी पक्षाचे खासदार आझम खान यांच्या अडचणी दिवसेंदिवस वाढताना दिसत आहेत. पोलिसांनी त्यांच्याविरोधात 13 प्रकरणांमध्ये चार्जशीट दाखल केली आहे. तसेच माजी खासदार जया प्रदाही कायद्याच्या कचाट्यात सापडल्या आहेत. त्यांच्याविरोधातही सहा चार्जशीट दाखल झाल्या आहेत. लोकसभा निवडणुकीदरम्यान आझम खान यांनी पंतप्रधान, उत्तर प्रदेशचे मुख्यमंत्री आणि जिल्हाधिकाऱ्यांविरोधात आक्षेपार्ह विधान केलं होतं. त्यांनी शाहबादमध्ये एका जनसभेला संबोधित करतानाही जया प्रदा यांच्याबद्दल अश्लील टिपण्णी केली होती.