हृदयद्रावक! बागेश्वर धामच्या बाबा धीरेंद्र शास्त्रींच्या दरबारात दीड वर्षीय मुलीचा मृत्यू

बाबांच्या धाममध्ये दीड वर्षाच्या निष्पाप मुलीचा मृत्यू झाल्याच्या घटनेने सर्वांनाच धक्का बसला आहे.

बाबा धीरेंद्र शास्त्री यांच्या बागेश्वर धाममधून एक हृदयद्रावक घटना समोर आली आहे. जबलपूर येथील बाबांच्या धाममध्ये दीड वर्षाच्या निष्पाप मुलीचा मृत्यू झाल्याच्या घटनेने सर्वांनाच धक्का बसला आहे. मिळालेल्या माहितीनुसार, बागेश्वर धाममध्ये सुरू असलेल्या भागवत पंडालमध्ये ही घटना घडली आहे. गुदमरल्यामुळे मुलाचा मृत्यू झाल्याचं म्हटलं जात आहे. अति उष्णतेमुळे आणि श्वास घेण्यासाठी हवा नसल्याने जीव गमवावा लागला. या प्रकरणाची माहिती मिळताच पोलीस घटनास्थळी दाखल झाले. 

सध्या पोलीस या संपूर्ण प्रकरणाचा तपास करत असल्याचे सांगण्यात येत आहे. बाबा धीरेंद्र शास्त्री यांच्या बागेश्वर धाममध्ये भागवत पंडाल लावण्यात आल्याचे सांगण्यात येत आहे. या पंडालमध्ये भागवतांची कथा होत होती. ही कथा ऐकण्यासाठी मोठ्या संख्येने लोक तेथे पोहोचले होते. बाबा धीरेंद्र शास्त्री यांचे दर्शन घेण्यासाठी आणि त्यांचे आशीर्वाद घेण्यासाठी भाविकांचीही गर्दी झाली होती. उष्णता आणि गर्दीमुळे एका लहान मुलीला श्वास घेण्यास त्रास होऊ लागला. 

मुलीची प्रकृती खालावल्यानंतर तिला तातडीने जवळच्या रुग्णालयात नेण्यात आले. मात्र, रुग्णालयातील डॉक्टरांनी मुलीला पाहताच तिला मृत घोषित केले. रुग्णालयात पोहोचण्यापूर्वीच मुलीचा मृत्यू झाल्याचे डॉक्टरांनी सांगितले. मुलीच्या मृत्यूने कुटुंबीयांना धक्का बसला आहे. रडून रडून आई बाबांची अवस्था वाईट झाली आहे. या घटनेनंतर नागरिकांमध्ये भीतीचे वातावरण आहे. 

मुलीच्या मृत्यूनंतर हा कार्यक्रम बंद करण्यात आल्याचे सांगण्यात येत आहे. बागेश्वर धाममध्ये मृत्यूची ही पहिलीच घटना नाही. याआधीही बागेश्वर धाममध्येच एका महिलेचा मृत्यू झाल्याची घटना समोर आली होती. ही महिला फिरोजाबाद येथील रहिवासी असल्याचे सांगण्यात आले. या महिलेने महिनाभर बागेश्वर धाम येथे मुक्काम केल्याचे सांगण्यात येत आहे. एका हिंदी वेबसाईटने याबाबतचे वृत्त दिले आहे. 

 सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"