गोव्यातील बार: स्मृती इराणींच्या अडचणींत वाढ

बारच्या निर्माणासाठी परवानगी नव्हती

लाेकमत न्यूज नेटवर्क
नवी दिल्ली : मुलीच्या गोव्यातील कॅफेच्या प्रकरणात महिला व बालविकास मंत्री स्मृती इराणी यांच्या अडचणी वाढल्या आहेत.
आसगाव ग्रामपंचायतने माहितीच्या अधिकारात स्पष्ट केले आहे की, ज्या ठिकाणी सिली सोल्स कॅफे व बार चालवला जात आहे, त्याच्या कोणत्याही निर्माणाची किंवा दुरुस्तीची परवानगी घेण्यात आलेली नाही. ग्रामपंचायत सचिवांनी गोव्याचे एक वकील एरेस रोड्रिग्स यांना आरटीआयअंतर्गत पाठवलेल्या पत्रात (२०२२-२३/९४४) म्हटले आहे की, आसगाव ग्रामच्या घर क्रमांक ४२५साठी २०१९पासून आतापर्यंत अँथनी डीगामा किंवा कोणत्याही व्यक्तीने निर्माण किंवा दुरुस्तीसाठी कोणताही अर्ज दिलेला नाही. या भूखंडावर सिली सोल्स कॅफे व बार चालवला जातो. यासाठी गोवा सरकारकडून अँथोनी डीगामाने लायसन्स घेतले आहे. अँथोनीचा २ वर्षांपूर्वी मृत्यू झाला. 

काँग्रेसचे आरोप काय?
    काँग्रेसने आरोप केला आहे की, हा कॅफे स्मृती इराणी यांची मुलगी जोईस चालविते. तर इराणींचा दावा आहे की, त्यांची मुलगी केवळ १८ वर्षांची आहे व सध्या महाविद्यालयात शिकते आहे. तिचा या कॅफेशी किंवा बारशी काहीही संबंध नाही. तथापि, स्मृती इराणी यांच्या सोशल मीडियावर अनेक पोस्ट समोर आल्या आहेत, ज्यात त्यांनी मुलीला उद्यमी म्हटले आहे. 
    या प्रकरणात गोवा सरकारने कॅफेला नोटीस दिली आहे. परंतु आसगाव ग्रामपंचायतच्या स्पष्टीकरणामुळे या कॅफेचे निर्माण अवैध रूपाने करण्यात आले होते व त्याचे लायसन्सही अवैध आहे, ही बाब समोर आली आहे.