अतूट प्रेम! पत्नीच्या मृत्यूनंतर काही क्षणात पतीनेही सोडला जीव; एकाच चितेवर दोघांना मुखाग्नी

अवघ्या काही तासांतच दोघांचा मृत्यू झाल्याने गावात शोककळा पसरली.

बिहारमधील रोहतास जिल्ह्यातून एक हृदयद्रावक घटना समोर आली आहे. एका वृद्ध महिलेचा मृत्यू झाला होता. महिलेच्या मृत्यूची माहिती मिळताच तिच्या पतीचाही मृत्यू झाला. या घटनेमुळे कुटुंबासह गावात शोककळा पसरली आहे. करगहर परिसरातील इटिम्हां गावात ही हृदयद्रावक घटना घडली आहे. 

60 वर्षीय तेतरी देवी दीर्घकाळापासून आजारी होत्या. बुधवारी त्यांचं निधन झाले. याची माहिती मिळताच त्यांचे पती गंगा सिंह (65 वर्षे) यांचाही मृत्यू झाला. अवघ्या काही तासांतच दोघांचा मृत्यू झाल्याने गावात शोककळा पसरली. यासोबतच एकाच दिवशी दोघांचाही मृत्यू झाल्याने परिसरात जोरदार चर्चा रंगली आहे.

या दाम्पत्याची मुलगी केबी सिंह सांगते की, तिची आई काही दिवसांपासून आजारी होती आणि तिच्यावर उपचार सुरू होते. याच दरम्यान, बुधवारी दुपारी त्यांचा मृत्यू झाला. मृत्यूची बातमी कळताच वडिलांची प्रकृतीही बिघडली. आईच्या अंत्यसंस्काराची तयारी सुरू होती. यानंतर वडिलांना उपचारासाठी रुग्णालयात नेण्याची व्यवस्था करण्यात आली. पण त्याचाही मृत्यू झाला.

अखेर दोघांची एकत्रत अंत्ययात्रा निघाली. यासोबतच स्मशानभूमीत पती-पत्नीवर एकाच चितेवर अंत्यसंस्कार करण्यात आले. लोकांचे म्हणणे आहे की या जोडप्याची तब्येतही एकत्र बिघडली होती. एकाच दिवशी आई-वडिलांचा मृत्यू झाल्याने कुटुंबावर दु:खाचा डोंगर कोसळला आहे. एका हिंदी वेबसाईटने याबाबतचे वृत्त दिले आहे.