भाजप आमदाराच्या स्कॉर्पिओची डंपरला धडक, गंभीर अवस्थेत रुग्णालयात दाखल

कैलाश खरवार हे सध्या चकिया विधानसभा मतदारसंघातून आमदार आहेत.

चंदौली - उत्तर प्रदेशच्या चंदौली जिल्ह्यातील गोल्हियाजवळ आमदारच्या स्कॉर्पिओ आणि डंपरची जोरदार धडक बसली. या धडकेत स्कॉर्पिओ कारच्या पत्र्याचे तुकडे उडाल्याचे दिसून आले. भाजप आमदार कैलास खरवार यांच्या गाडीला हा भीषण अपघात झाला. त्यामध्ये, त्यांना गंभीर जखम झाली असून त्यांच्या बॉडीगार्डलाही इजा झाली आहे. दोघांनाही उपचारासाठी रुग्णालयात दाखल करण्यात आले आहे.

कैलाश खरवार हे सध्या चकिया विधानसभा मतदारसंघातून आमदार आहेत. खरवार हे रात्री उशिरा चकिया येथून आपल्या घरी परत येत असताना गोल्हिया सिकंदरपूर वळणालगत समोरुन आलेल्या डंपरला स्कॉर्पिओची जोरदार धडक बसली. या दुर्घटनेत स्कॉर्पिओच्या काही भागाचे तुकडे उडाले. आमदार कैलाश खरवार आणि त्यांचा गनमन अनिल सरोज दोघेही जखमी झाले. आमदाराच्या डोक्याला आणि उजव्या हाताला गंभीर जखम झाली. तर, गाडीतील आणखी दोन लोकंही जखमी झाले आहेत. 

अपघाताची घटना घडताच स्थानिकांनी अपघातस्थळावर गर्दी केली होती. त्यानंतर, जिल्हा प्रशासनाला कळवून आमदारांसह जखमींना जिल्हा रुग्णालयात दाखल करण्यात आले. त्यानंतर, भाजपा कार्यकर्ते आण नातेवाईकांनी रुग्णालयात धाव घेतली. आमदारांची प्रकृती गंभीर असल्याने डॉक्टरांनी त्यांना वाराणसीतील ट्रॉमा सेंटर येथे रेफर केले आहे. सध्या त्यांच्यावर तेथेच उपचार सुरू आहेत.