बीजेपीच्या महिला नेत्यानं सेक्रेटरीस चपलेन हाणलं, सोशल मीडियावर व्हिडिओ व्हायरल

हरियाणातील हिसार येथील मार्केट कमिटीमध्ये सोनाली फोगाट पोहोचल्या होत्या. त्यावेळी, काही कारणावरुन मार्केट कमिटीच्या सेक्रेटरीसोबत त्यांचा वाद झाला.

हिसार - भाजपा नेत्या आणि टीकटॉक स्टार सोनाली फोगाट यांनी हिसार मार्केट किमिटीचे सेक्रेटरी सुल्तानसिंह यांना चारचौघात चपलेनं मारहाण केली आहे. सोशल मीडियावर सोनाली यांचा हा व्हिडिओ मोठ्या प्रमाणात व्हायरल होत आहे. सोनाली यांनी चपलेसह त्यांना थप्पडही लगावली आहे. असभ्य भाषेचा वापर केल्यामुळे फोगाट यांनी कमिटीच्या सेक्रेटरीवर हल्लाबोल केला. तेथील उपस्थितांनीच हा व्हिडिओ शूट केला आहे. 

हरियाणातील हिसार येथील मार्केट कमिटीमध्ये सोनाली फोगाट पोहोचल्या होत्या. त्यावेळी, काही कारणावरुन मार्केट कमिटीच्या सेक्रेटरीसोबत त्यांचा वाद झाला. शब्दा-शब्दातील हे भांडण वाढल्याने, सोनाली यांनी थेट सेक्रेटरी सुल्तानसिंह यांना कानशिलात लगावली. त्यानंतर, आपल्या पायातील चप्पल काढून त्यांना मारहाण केली. घटनास्थळावर उपस्थित असलेल्या नागरिकांनी या घटनेचा व्हिडिओ बनवला असून तो सोशल मीडियावर व्हायरल होत आहे. या व्हिडिओत सोनाल यांचा आवाज ऐकायला येत आहे. 'आप किस तरह से ऐसी बात कर सकते है'... असं त्या व्हिडिओत म्हणत आहेत.

मार्केट कमिटीच्या सेक्रेटरीने त्यांच्याशी गैरवर्तन केले, असा आरोप सोनाली यांनी केला आहे. त्यामुळए, संताप अनावल झाल्याने सोनाली यांनी थेट चपलेचा वापर करुन सेक्रेटरीला मारहाण केली. हरियाणातील गेल्या विधानसभा निवडणुकीत सोनाली फोगाट यांनी आदमपूर मतदारसंघातून माजी मुख्यमंत्री भजनलालचे सुपुत्र कुलदीप बिश्नोई यांच्याविरुद्ध निवडणूक लढवली होती. सोनाली फोगाट या टीकटॉक स्टार असून टीकटॉकवर त्यांचे अनेक व्हिडिओ व्हायरल झाले आहेत.