अंध विद्यार्थ्यांना शिक्षकाची अमानूष मारहाण

आंध्रप्रदेशमधील काकिनाडा येथील एका शाळेत शिकणा-या तिघा अंध विद्यार्थ्यांना शिक्षकाने अमानूषपद्धतीने मारहाण केल्याची संतप्त घटना समोर आली आहे.

ऑनलाइन टीम

काकिनाडा (आंध्रप्रदेश), दि. २१ - आंध्रप्रदेशमधील काकिनाडा येथील एका शाळेत शिकणा-या तिघा अंध विद्यार्थ्यांना शिक्षकाने अमानूषपद्धतीने मारहाण केल्याची संतप्त घटना समोर आली आहे. या मारहाणीचा व्हिडीओ समोर आल्यावर आंध्रप्रदेशच्या शिक्षण मंत्र्यांनी जिल्हा शिक्षण अधिका-याकडून अहवाल मागवला आहे.  

काकिनाडा येथील एका शाळेत तिघा अंध विद्यार्थ्यांना शिक्षक अत्यंत अमानूष पद्धतीने मारत असल्याचा व्हिडीओ सोमवारी प्रसारमाध्यमांमध्ये आला आहे. तिघे विद्यार्थी शिक्षकाला मारहाण न करण्याची कळकळून विनंती करत आहेत. पण शिक्षक मारणे थांबवत नसल्याचे या व्हिडीओमध्ये दिसते. या व्हिडीओत शिक्षकासोबत आणखी एक व्यक्ती मुलांना मारताना दिसतो. आंध्रप्रदेशमधील अनेक समाजसेवी संघटनांनी या घटनेचा तीव्र निषेध दर्शवत शिक्षकाविरुद्ध कारवाईची मागणी केली आहे. दरम्यान, या प्रकरणात पोलिसांनी स्वतःहून पुढाकार घेत शिक्षकाविरुद्ध गुन्हा दाखल करुन त्याला अटक करावी अशी मागणी समाजसेवी संस्थांनी केली आहे. मात्र ही मारहाण का सुरु होती, शिक्षक व त्याच्या सोबतच्या सहका-याचे नाव काय याबाबत कोणतीही माहिती अद्याप समोर आलेली नाही.