आमचा विरोध करता-करता काँग्रेसचा भारतालाच विरोध : पंतप्रधान मोदी

विविध प्रकल्पांचे उद्घाटन

जोधपूर : ‘भाजपला विरोध करता करता काँग्रेस  पक्ष आता भारताचाच विरोध करू लागला आहे. आज संपूर्ण जगात भारताचा जयजयकार होत आहे, मात्र काँग्रेसला यामुळे अडचणींचा सामना करावा लागत आहे,’ अशी टीका पंतप्रधान नरेंद्र मोदी यांनी गुरुवारी केली.

येथील ‘रावण का चबुतरा’ मैदानावर निवडणूक सभेला संबोधित करताना मोदी यांनी पेपरफुटी, महिलांवरील अत्याचार आणि ‘लाल डायरी’ या मुद्द्यांवरून राज्यातील काँग्रेस सरकारवर निशाणा साधला.

पायाभूत सुविधांवर भर

पंतप्रधान मोदी यांनी रस्ते, रेल्वे, विमान वाहतूक, आरोग्य आणि उच्च शिक्षण क्षेत्राशी संबंधित सुमारे ५,००० कोटी रुपयांच्या विकास प्रकल्पांची पायाभरणी आणि उद्घाटन केले.

या प्रकल्पांतर्गत येथील एम्समध्ये ३५० खाटांचे ‘ट्रॉमा सेंटर आणि क्रिटिकल केअर हॉस्पिटल ब्लॉक’ आणि पंतप्रधान-आयुष्मान भारत अंतर्गत सात क्रिटिकल केअर ब्लॉक विकसित होईल. तसेच आयआयटी, जोधपूर कॅम्पसही राष्ट्राला समर्पित करण्यात आला.