चंदिगडमध्ये रॅपर बादशाहच्या नाईट क्लबमध्ये स्फोट; खंडणीच्या उद्देशाने स्फोट, पोलिसांचा दावा

चंदीगडच्या दोन नाईट क्लबजवळ मंगळवारी पहाटे स्फोट झाल्याची घटना समोर आली आहे. रॅपर बादशाहचा हा नाईट क्लब असल्याचं म्हटलं जात आहे. हे स्फोट देशी बनावटीच्या बॉम्बच्या साह्याने करण्यात आल्याचं सांगण्यात येत आहे. या प्रकरणाचा तपास करण्यासाठी एनआयएचे पथक घटनास्थळी पोहोचणार आहे.

दोन अज्ञात दुचाकीस्वारांनी सेक्टर २६ मध्ये असलेल्या दोन नाईट क्लबजवळ संशयित स्फोटकं फेकल्याचं सांगितलं जात आहे. मंगळवारी पहाटे चारच्या सुमारास हा हल्ला करण्याला. हे अत्यंत कमी क्षमतेचे स्फोट असल्याचं सांगण्यात येत आहे. या घटनेत कोणीही जखमी झालेलं नाही.

ज्या क्लबमध्ये हा स्फोट झाला तो रॅपर बादशाहच्या मालकीचा असल्याचं सांगण्यात येत आहे. घटनेच्या व्हिडिओमध्ये क्लबच्या तुटलेल्या खिडक्या दिसत आहेत. देशी बनावटीचे बॉम्ब खंडणीच्या उद्देशाने फेकण्यात आल्याचं सूत्रांचं म्हणणं आहे. मात्र तरीही पोलीस या हल्ल्यामागील हेतू तपासत आहेत. चंदीगड पोलीस फॉरेन्सिक टीमच्या मदतीने या प्रकरणाचा तपास करत आहेत.