भगव्या दहशतवादाच्या नावाखाली काँग्रेसनं अडकवलं - साध्वी प्रज्ञा सिंह

>ऑनलाइन लोकमत
भोपाळ, दि. 27 - 2008 च्या मालेगाव बॉम्बस्फोट खटल्यातील आरोपी असलेल्या साध्वी प्रज्ञा सिंह आज जामिनावर तुरूंगातून बाहेर आल्या आहेत. मुंबई उच्च न्यायालयाने मंगळवारी जामीन मंजूर केला होता. तुरुंगातून बाहेर आल्यानंतर त्यांनी पत्रकार परिषद घेत काँग्रेसवर टीका केली. यावेळी बोलताना त्या म्हणाल्या नऊ वर्षांच्या अन्यायातून मुक्त झाले आहे, आता स्वतःवर योग्य उपचार करुन घेणार आहे. यावेळी बोलताना साध्वी प्रज्ञा सिंह यांनी हायकोर्टाचे आभार मानले. तसेच गेल्या 9 वर्षांत दहशतवादाला बळी पडलेल्या शहिदांना श्रद्धांजली वाहिली. भगवा दहशतवाद हा काँग्रेसने रचलेला कट होता, असा आरोप करत या कटाची मी बळी झाल्याचे साध्वींनी म्हटले. यामुळे तब्बल नऊ वर्षे आपल्यावर अन्याय झाल्याचेही त्यांनी सांगितले. पुढे बोलताना त्या म्हणाल्या, "स्वतंत्र भारताच्या इतिहासात मला जो त्रास सहन करावा लागला, तसा कोणत्याही महिलेला करावा लागला नसेल. तब्बल नऊ वर्षे तुरुंगात अनेक पीडा सहन कराव्या लागल्या. मला झालेल्या आजाराला एटीएस जबाबदार आहे."