Coronavirus: चीनमधील ९० भारतीयांची तपासणी; येण्याचा मार्ग मोकळा

अनेक दिवसांपासून भारतीय दूतावास चीन सरकारशी समन्वय साधत होता. अखेर बुधवारी त्यांची तपासणी झाली.

सातारा : गेल्या महिन्यापासून चीनमध्ये अडकून पडलेल्या ९० भारतीयांची आरोग्य तपासणी बुधवारी झाली. त्यामुळे त्यांचा परतण्याचा मार्ग मोकळा झाला आहे.

अनेक दिवसांपासून भारतीय दूतावास चीन सरकारशी समन्वय साधत होता. अखेर बुधवारी त्यांची तपासणी झाली. त्यांना भारतात आणण्यासाठी वुहान येथे विमान दाखल झाले आहे. त्यामुळे ते कोणत्याही क्षणी भारतात येऊ शकतात.

चीनमध्ये कोरोना व्हायरसचा संसर्ग मोठ्या प्रमाणावर झाल्यानंतर भारताने खास विमानाने तेथे अडकलेल्या भारतियांना मायदेशी परत आणले आहे. मात्र काही तांत्रिक अडचणींमुळे तसेच तपासणी न झाल्याने अनेक भारतीय अद्याप चीनमध्ये अडकले आहेत. भारतीय दूतावासाने चीनमधील या भारतीयांना संदेश पाठवून तपासणीची माहिती दिली. आज संध्याकाळी सुरू झालेली तपासणी रात्री उशिरापर्यंत सुरूच होती.

सुटकेचा नि:श्वास
चीनमधील आपले नातेवाईक कधी परत येणार याची पालकांना काळजी होती. त्यांची वैद्यकीय तपासणी झाल्यामुळे ते आता भारतात येऊ शकतील, या विश्वासाने त्यांनी सुटकेचा नि:श्वास सोडला.