कोरोनाचा बूस्टर डोस घेण्यास लोक करतात टाळाटाळ, 5 कोटी पात्र असूनही घेतला नाही डोस!

covid booster dose : कोरोनाच्या तिसर्‍या लाटेनंतर पुन्हा एकदा प्रकरणांमध्ये चढ-उतार पाहायला मिळत आहे. पण कोरोनापासून बचाव करण्यासाठी लोक अजूनही बूस्टर डोस घेण्यास टाळाटाळ करत आहेत.

नवी दिल्ली : देशात गेल्या 24 तासांत 2745 नवे कोरोनाबाधित आढळले असून सहा रुग्णांचा मृत्यू झाला आहे. देशात मंगळवारी दिवसभरात नव्याने नोंद झालेल्या कोरोना रुग्णांच्या संख्येत भर पडली आहे. तर 2,236 लोक कोरोनापासून बरे झाले आहेत. देशातील कोरोनाच्या एकूण रुग्णांची संख्या 4 कोटी 31 लाख 60 हजारांच्या पुढे गेली आहे. एकूण सक्रिय रुग्णांची संख्या 17 हजार 800 झाली आहे. कोरोनाच्या तिसर्‍या लाटेनंतर पुन्हा एकदा प्रकरणांमध्ये चढ-उतार पाहायला मिळत आहे. पण कोरोनापासून बचाव करण्यासाठी लोक अजूनही बूस्टर डोस घेण्यास टाळाटाळ करत आहेत.

हिंदुस्तान टाईम्सच्या रिपोर्टनुसार, गेल्या वर्षी 16 जुलैपर्यंत 7 कोटी 95 लाख लोकांना कोरोनाचे दोन्ही डोस मिळाले होते, परंतु 5 कोटी 25 (66.1%) लाख लोकांनी 30 एप्रिलपर्यंत बूस्टर डोस घेतला नाही. हे सर्व बूस्टर डोससाठी पात्र होते. ही स्थिती कोणत्याही विशिष्ट राज्याची नाही, परंतु लोक बूस्टर डोस घेत नाहीत, ही संपूर्ण देशाची समस्या आहे. 30 मे पर्यंत देशातील अर्ध्या जिल्ह्यांमध्ये 80 टक्के किंवा त्याहून अधिक पात्र लोकांनी बूस्टर डोस घेतला नव्हता.

गेल्या 24 तासांत भारतातील सर्वाधिक प्रकरणे नोंदवणाऱ्या पहिल्या पाच राज्यांमध्ये केरळ 726 प्रकरणांसह पहिल्या क्रमांकावर आहे, त्यानंतर महाराष्ट्रात 711 प्रकरणे, दिल्लीत 373 प्रकरणे, कर्नाटकात 197 प्रकरणे आणि हरयाणामध्ये 161 प्रकरणे समोर आली आहेत. या पाच राज्यांमधून 78.99% नवीन प्रकरणे समोर आली आहेत. नवीन प्रकरणांपैकी 26.45% एकट्या केरळमधील आहेत. देशात गेल्या 24 तासात कोरोनामुळे 6 मृत्यू झाले असून एकूण मृतांची संख्या 5,24,636 वर पोहोचली आहे.

भारताचा रिकव्हरी रेट आता 98.74 टक्के आहे. गेल्या 24 तासांत एकूण 2,236 रुग्ण बरे झाले असून, देशभरातील एकूण बरे झालेल्यांची संख्या 4,26,17,810 झाली आहे. देशात गेल्या 24 तासात एकूण 10,91,110 कोरोनाच्या लस देण्यात आल्या आहेत. त्यानंतर आतापर्यंत दिलेल्या डोसची एकूण संख्या 1,93,57,20,807 झाली आहे. गेल्या 24 तासात एकूण 4,55,314 नमुन्यांची तपासणी करण्यात आली.

दुसरीकडे, दिल्लीत गेल्या 24 तासात कोरोनाचे 373 नवीन प्रकरणे समोर आली आहेत. दिल्लीत पॉझिटिव्हिटी दर 2.15 टक्के होता. तर 17371 चाचण्या झाल्या आणि 255 लोक बरे झाले. दिल्लीत गेल्या 24 तासांत कोरोनामुळे एकाचा मृत्यू झाला आहे. एकूण सक्रिय रुग्णांची संख्या 1603 असून रुग्णालयातील रुग्णांची संख्या 64 आहे.