क्राईम फाईल

क�

��ख्यात खट्याचा हल्ला
नागपूर : कळमन्यातील विनोबा भावे नगरात राहणारा कुख्यात खट्या ऊर्फ सूरज धवड याने आपल्या ६ साथीदारांसह अंबेनगरातील विजय कटरू मसरले (वय ३०) याच्या घरावर हल्ला चढवला.
खट्याच्या मैत्रिणीसोबत मसरले परिवाराची हाणामारी झाली. त्याचा वचपा काढण्यासाठी गुरुवारी रात्री १० च्या सुमारास खट्या आपल्या साथीदारांसह मसरलेच्या घरात शिरला. विजय आणि त्याच्या परिवारातील सदस्य यावेळी जेवण करीत होते. त्या सर्वांना लाकडी दंडुका तसेच सब्बलीने मारहाण केली. या घटनेमुळे परिसरात दहशत निर्माण झाली. कळमना पोलिसांनी आरोपींविरूध्द गुन्हा नोंदविला. खट्या आणि त्याच्या साथीदारांचा शोध घेतला जात आहे.
----
युवतीची आत्महत्या
नागपूर : विशाखा रामरतन इंगळे (वय १५) हिने विष प्राशन करून आत्महत्या केली. शुक्रवारी पहाटे ५ ला तिने विष घेतल्याचे लक्षात आले. त्यामुळे कुटुंबीयांनी विशाखाला उपचारासाठी मेयोत भरती केले. तेथे दुपारी १२.१५ ला डॉक्टरांनी तिला मृत घोषित केले. याप्रकरणी यशोधरानगर पोलिसांनी अकस्मात मृत्यूची नोंद केली. विशाखाच्या आत्महत्येमागचे कारण शोधले जात आहे.

---
कुख्यात संजय शाहू स्थानबद्ध
नागपूर : कुख्यात गुंड संजय रामलाल शाहू (वय २०, रा. शामनगर) याच्याविरुद्ध हुडकेश्वर पोलिसांनी एमपीडीएची कारवाई केली. त्याच्याविरुद्ध हुडकेश्वर आणि सक्करदरा पोलीस ठाण्यात अनेक गंभीर गुन्हे दाखल आहेत. ते लक्षात घेता पोलीस आयुक्तांनी त्याला स्थानबद्ध करून कारागृहात डांबण्याचे आदेश दिले.
----