...अन् वराती ऐवजी निघाली अंत्ययात्रा! सिलिंडरचा स्फोट; नवऱ्याची आई, काकी, वहिनी, 2 बहिणींचा मृत्यू

लग्नघरात पाच महिलांचा मृत्यू झाल्याची धक्कादायक घटना घडल्यानंतर कुटुंबासह संपूर्ण गावात शोककळा पसरली आहे.

राजस्थानसारखाच एक प्रकार मध्य प्रदेशातील भिंडमध्येही घडला आहे. लग्नाच्या विधीदरम्यान घरात ठेवलेल्या गॅस सिलिंडरचा स्फोट झाला, उपचारादरम्यान नवरदेवाची आई, काकी, वहिनी आणि दोन बहिणींचा मृत्यू झाला. काही महिन्यांपूर्वी राजस्थानच्या जोधपूरमध्येही अशीच एक घटना घडली होती, जिथे लग्नाची वरात निघण्यापूर्वी घरातील गॅस सिलिंडरचा स्फोट होऊन 35 जणांचा मृत्यू झाला होता.

मध्यप्रदेशातील लग्नघरात पाच महिलांचा मृत्यू झाल्याची धक्कादायक घटना घडल्यानंतर कुटुंबासह संपूर्ण गावात शोककळा पसरली आहे. घरामध्ये लग्नाची जोरदार तयारी सुरू होती. पण या घटनेने हसतं खेळतं घर उद्ध्वस्त झालं आहे. मिळालेल्या माहितीनुसार, भिंड जिल्ह्यातील गोरमी भागातील कचनाव कला गावात राहणाऱ्या रिंकू यादवची लग्नाची वरात 22 फेब्रुवारीला जाणार होती. 

20 फेब्रुवारी रोजी लग्नाचे विधी पार पडले. रिंकूच्या घरी कुटुंबाव्यतिरिक्त नातेवाईक आणि गावातील लोक उपस्थित होते. लोकांसाठी जेवण तयार केले जात होते. याच दरम्यान गॅस सिलिंडरचा वापर स्वयंपाकासाठी केला जात होता. अचानक सिलिंडरचा स्फोट झाला. या घटनेत रिंकू यादवची आई जलदेवी, वहिनी नीरू, काकी पिंकी, दोन विवाहित बहिणी अनिता आणि सुनीता यांच्यासह 12 जण गंभीर जखमी झाले आहेत. या घटनेनंतर गावात एकच खळबळ उडाली आहे.

उपचारासाठी सर्वांना जवळच्या रुग्णालयात नेण्यात आले. त्यांची प्रकृती गंभीर असल्याने 8 जणांना ग्वाल्हेरला रेफर करण्यात आले. मात्र, रिंकू यादवची आई, वहिनी, पिंकी आणि दोन्ही बहिणींची प्रकृती चिंताजनक असल्याने त्यांना दिल्ली एम्समध्ये पाठवण्यात आले. त्यामुळे पाचही महिलांवर एम्समध्ये उपचार सुरू होते. पण पाचही महिलांचा उपचारादरम्यान मृत्यू झाला. बुधवारी सकाळी सर्वांचे मृतदेह गावात आणण्यात आले. एका हिंदी वेबसाईटने याबाबतचे वृत्त दिले आहे. 

सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"