वाहनाच्या धडकेत तरुणाचा मृत्यू

व�

��हनाच्या धडकेत तरुणाचा मृत्यू
नागपूर : भरधाव अज्ञात वाहनाने मोटरसायकलला धडक दिली. यात गंभीर जखमी झालेल्या तरुणाचा उपचारादरम्यान मृत्यू झाला. ही घटना बुटीबोरी पोलीस ठाण्याच्या हद्दीतील बोथली शिवारात सोमवारी सकाळी ५.१५ वाजताच्या सुमारास घडली. निखील सुरेश राऊत (२६, रा. बोरगाव, ता. उमरेड) असे मृत तरुणाचे नाव आहे. निखील हा एमएच-४०/एएच-७०१४ क्रमांकाच्या मोटरसायकलने जात होता. दरम्यान, भरधाव अज्ञात वाहनाने त्याच्या मोटरसायकलला धडक दिली. यात गंभीर दुखापत झाल्याने त्याला नागपूर येथील मेडिकल हॉस्पिटलमध्ये भरती करण्यात आले. तिथे उपचारादरम्यान त्याचा मृत्यू झाला. या प्रकरणी बुटीबोरी पोलिसांनी भादंवि २७९, ३०४ (अ)अन्वये गुन्हा नोंदवून तपास सुरू केला आहे. (प्रतिनिधी)
***
सहा ब्रास रेती जप्त
कळमेश्वर : पोलिसांनी घोराड शिवारात केलेल्या कारवाईमध्ये सहा ब्रास रेती जप्त केली. ही कारवाई रविवारी रात्री ८.३० वाजताच्या सुमारास करण्यात आली.
घोराड शिवारातून रेतीची अवैध वाहतूक केली जात असल्याची माहिती कळमेश्वर पोलिसांना मिळाली होती. या माहितीच्या आधारे पोलिसांनी वाहनांची तपासणी केली असता एमएच-२७/एक्स-७७०० क्रमांकाच्या ट्रकमध्ये रेती असल्याचे निदर्शनास आले. कागदपत्रांच्या तपासणीअंती ही रेती विना रॉयल्टी असल्याचे स्पष्ट होताच ट्रकसह रेती जप्त करण्यात आली. या कारवाईमध्ये १० हजार रुपये किमतीच्या सहा ब्रास रेतीसह एकूण ३ ताख १० हजार रुपये किमतीचा मुद्देमाल जप्त केल्याचे पोलिसांनी सांगितले. याप्रकरणी कळमेश्वर पोलिसांनी भादंवि ३७९ अन्वये गुन्हा नोंदवून सय्यद इरफान सय्यद युसूूफ (३०, रा. अमरावती) यास अटक केली. (प्रतिनिधी)
***