मुख्याध्यापकाच्या मारहाणीत तिसरीतील विद्यार्थ्याचा मृत्यू

लखनऊ, दि. ९ - शाळेतील स्टेशनरी चोरली म्हणून मुख्याध्यापकाने केलेली मारहाण एका विद्यार्थ्याच्या जीवावर बेतली असून अवघ्या तिस-या इयत्तेत शिकणा-या मुलाचा मृत्यू झाला आहे. उत्तरप्रदेशमधील बाराबांकी येथे ही दुर्दैवी घटना घडली आहे. 

सिवा असे मृत्यूमुखी पडलेल्या विद्यार्थ्याचे नाव असून तो बाराबांकी येथील रहेलामाऊ या गावचा रहिवसी आहे. शाळेतील स्टेशनरी गायब झाल्याची तक्रा आल्यानंतर शिक्षकांनी तिस-या इयत्तेतील सर्व मुलांच्या बॅग्जची तपासणी केली. शिवाच्या ब२गेत सापडलेल्या सामानाची माहिती एका शिक्षिकेने मुख्याध्यापक ललित वर्मा यांना दिली असता, त्यांनी त्याला बेदम मारहाण केली. त्यानंतर शिवा घरी आला असता अचानक त्याच्या पोटात दुखू लागले आणि त्याला रक्ताच्या उलट्या झाल्या. उपचारांसाठी त्याला तातडीने रुग्णालयात दाखल करण्यात आले खेर, मात्र तेथे डॉक्टरांनी त्याला मृत घोषित केले. 

यापूर्वीही ललित वर्मा यांनी विद्यार्थ्यांना मारहाण केल्याच्या घटना घडल्या असून त्याप्रकरणी शाळा प्रशासनाकडे तक्रारही करण्यात आली होती, मात्र त्याकडे दुर्लक्ष करण्यात आले. याप्रकरणी शिवाच्या वडिलांनी नोंदवलेल्या तक्रारीनंतर बिद्दापूर पोलिस स्थानकांत गुन्हा दाखल करण्यात आल्याचे पोलिसांनी सांगितले.