घरात पत्नीच्या जाचाला वैतागून मुख्याध्यापकांनी शाळेतच थाटला संसार, आता झाली अशी कारवाई

Teacher News: पत्नीसोबत झालेल्या भांडणाला वैतागून एका शाळेच्या मुख्याध्यापकांनी थेट शाळेतच संसार थाटल्याची घटना समोर आली आहे.

लखनौ - पत्नीसोबत झालेल्या भांडणाला वैतागून एका शाळेच्या मुख्याध्यापकांनी थेट शाळेतच संसार थाटल्याची घटना समोर आली आहे. उत्तर प्रदेशमधील हरदोई जिल्ह्यामध्ये शुक्रवारी सोशल मीडियावर एक  व्हिडीओ व्हायरल होत आहे. या व्हिडीओमध्ये प्राथमिक शिक्षण विभागातील शिक्षकाने घरात झालेल्या भांडणानंतर शाळेतील एका खोलीतच आपला संसार थाटल्याचे दिसत आहे. एवढेच नाही तर या शिक्षकाने शाळेच्या खोलीमध्येच आपले बेड आणि आवश्यक ते सामानसुद्धा ठेवले. एवढेच नाही तर शाळेच्या खोलीत मद्यपान केल्याचा आरोपही या शिक्षकावर होत आहे. (Due to his wife's harassment at home, the headmaster started school at school)

शिक्षकाच्या या कृत्याचा व्हिडीओ सोशल मीडियावर व्हायरल झाला आहे. सोशल मीडियावर हा व्हिडीओ व्हायरल झाल्यानंतर बीएसएने शिक्षकाला निलंबित केले आहे. तसेच आता या संपूर्ण प्रकरणाची चौकशी शिक्षणाधिकाऱ्यांकडे सोपवण्यात आली आहे. सोशल मीडियावर याबाबत व्हायरल झालेल्या व्हिडीओमध्ये खोलीच्या आत एक डबल बेड दिसत आहे. त्यावर एक व्यक्ती बसलेली दिसत आहे. खोलीमध्ये अजून काही सामान टेबलावर ठेवलेले आहे. खोलीमध्ये टीव्हीसुद्धा ठेवलेली आहे. तसेच एकवेळ तुम्हाला हे सर्व सामान्य असल्यासारखे वाटेल, पण येथे मामला काही वेगळाच आहे.

ही घटना माधवगंज ब्लॉकमधील माहिमपूर प्राथमिक विद्यालयातील आहे. येथे एका खोलीमध्ये मुख्याध्यापक सुधीर कुमार यांनी आपला संसार थाटला आहे. सुधीर कुमार शिक्षक असले तरी मुख्याध्यापकपदाचा चार्जही त्यांच्याकडे आहे. दरम्यान, शाळेच्या खोलीत त्यांनी बेड टीव्हीसह इतर साहित्याचीही जमवाजमव केली आहे.

दरम्यान, शाळेच्या आवारात मद्याच्या रिकाम्या बाटल्यासुद्धा पसरलेल्या दिसून आल्या. या शिक्षकांवर शाळेत राहत असताना मद्यपान केल्याचा आरोप झाला आहे. हा व्हिडीओ सोशल मीडियावर व्हायरल झाल्यानंतर बीएसएनी शिक्षणाधिकाऱ्यांना घटनास्थळी पाठवले. तेव्हा समजले की, घरात पत्नीसोबत झालेल्या भांडणानंतर सुधीर कुमारने शाळेलाच आपले घर बनवले होते. त्यानंतर तातडीने शाळेचे आवार रिकामी करून आरोपी शिक्षकाला निलंबित करण्यात आले आहे.