मृत्यू झाल्याचे भासवून आठ वर्षाच्या मुलीने बलात्का-याच्या तावडीतून केली सुटका

पिडित मुलगी दिल्लीच्या किरारी भागामध्ये रहाते. शुक्रवारी मध्यरात्री दीडच्या सुमारास आरोपीने पिडित तरुणी तिच्या घराबाहेर कॉटवर झोपलेली असताना तिचे अपहरण केले.

ऑनलाइन लोकमत 

नवी दिल्ली, दि. ०१ - एका आठ वर्षाच्या मुलीने स्वत:चा मृत्यू झाल्याचे भासवून बलात्का-याच्या तावडीतून सुटका करुन घेतल्याची घटना दिल्लीमध्ये घडली. पिडित मुलगी दिल्लीच्या किरारी भागामध्ये रहाते. शुक्रवारी मध्यरात्री दीडच्या सुमारास आरोपीने पिडित बालिका घराबाहेर कॉटवर झोपलेली असताना तिचे अपहरण केले. 

 

मात्र जाग आल्यानंतर आपण अनोळखी ठिकाणी असल्याचे तिच्या लक्षात आले. तिने आरडाओरडा करण्याचा प्रयत्न केला पण आरोपीने तिचे तोंड दाबले. आरोपीने पिडित अल्पवयीन मुलीला निर्जन स्थळी नेऊन तिच्यावर बलात्कार केला. बलात्कारानंतर आरोपी आपल्याला ठार मारेल अशी त्या मुलीला भिती वाटत होती. म्हणून ती काहीही हालचाल न करता निपचित पडून राहिली जेणेकरुन आरोपीला मृत्यू झाला आहे असे वाटावे. 

 

मुलीचा मृत्यू झाला असे समजून आरोपी तिथून निघताच पिडित मुलगी उठली व घराच्या दिशेने पळू लागली. हा प्रकार आरोपीच्या लक्षात येताच त्याने पाठलाग करण्याचा प्रयत्न केला. या मुलीने घरी पोहोचून घडला प्रकार आई-वडीलांना सांगितला. त्यानंतर पोलिसात तक्रार दाखल केली. पिडित मुलीला रुग्णालयात दाखल करण्यात आले असून, तिला आज डिस्चार्ज मिळण्याची शक्यता आहे. आरोपीला मंगळवारी अटक करण्यात आली.