हरयाणात विचित्र अपघात चार ठार, ३० गाडया परस्परांवर आदळल्या

हरयाणात करनालमध्ये राष्ट्रीय महामार्ग एकवर निलोकेहरी येथे बुधवारी सकाळी एक विचित्र अपघात झाला. या महामार्गावरुन चाललेल्या ३० गाडया परस्परांवर धडकल्या.

ऑनलाइन लोकमत 

नवी दिल्ली, दि. १० - हरयाणात करनालमध्ये राष्ट्रीय महामार्ग एकवर निलोकेहरी येथे बुधवारी सकाळी एक विचित्र अपघात झाला. या महामार्गावरुन चाललेल्या ३० गाडया परस्परांवर धडकल्या. या अपघातात एका गाडीतील चौघांचा मृत्यू झाला. 

 

पहाटेच्यासमयी असणा-या दाट धुक्यांमुळे हा अपघात झाला. या महामार्गावरुन चाललेला एक ट्रक बंद पडताच मागून येणारी गाडी ट्रकला धडकली. त्यानंतर रांगेमध्ये असलेल्या २५ ते ३० गाडया एकापाठोपाठ एक परस्परांवर आदळल्या. 

 

दाट धुक्यांमुळे समोरचे स्पष्ट दिसत नव्हते. त्यामुळे चालकाला नियंत्रण राखता आले नाही असे महामार्ग गस्त अधिकारी मनोज कुमार यांनी एएनआयला सांगितले. छायाचित्रांमध्ये ट्रकच्या मागच्या बाजूचा पूर्ण चेंदामेंदा झाल्याचे दिसत आहे. अशा प्रकारचे अपघात परदेशातील रस्त्यांवर होतात. भारतात अशा प्रकारच्या अपघाताची दुर्मिळ घटना आहे.