भारतात कोरोनाचा फैलाव वाढला, पंतप्रधान मोदींनी जी-७ बैठकीसाठीचा दौरा रद्द केला 

G 7 Summit: पंतप्रधान नरेंद्र मोदी हे ब्रिटनमध्ये होणाऱ्या जी ७ संमेलनामध्ये सहभागी होणार नाहीत.

नवी दिल्ली - पंतप्रधान नरेंद्र मोदी हे ब्रिटनमध्ये होणाऱ्या जी ७ संमेलनामध्ये सहभागी होणार नाहीत. देशात वाढत असलेल्या कोरोनाच्या संसर्गाच्या पार्श्वभूमीवर नरेंद्र मोदी यांनी आपला ब्रिटन दौरा रद्द केला आहे. ( corona virus) ही माहिती मंगळवारी परराष्ट्र मंत्रालयाने दिली. जी-७ बैठकीमध्ये सहभागी होण्यासाठी ब्रिटनचे पंतप्रधान बोरिस जॉन्सन यांनी नरेंद्र मोदींना निमंत्रित केले होते. (Corona spread in India, Prime Minister Modi cancels G-7 visit)

 परराष्ट्र मंत्रालयाकडून याबाबत देण्यात आलेल्या माहितीत सांगण्यात आले की, आम्ही ब्रिटनच्या पंतप्रधानांकडून देण्यात आलेल्या जी-७ देशांच्या बैठकीत सहभागी होण्यासाठीच्या निमंत्रणाची प्रशंसा करतो. मात्र देशातील कोरोनाच्या संसर्गाची सद्यस्थिती पाहता पंतप्रधान नरेंद्र मोदी हे जी-७ देशांच्या बैठकीत व्यक्तिगतरीत्या सहभागी होणार नाहीत. 

भारत हा जी-७ देशांचा सदस्य नाही आहे. मात्र ब्रिटनचे पंतप्रधान बोरिस जॉन्सन यांनी या देशांच्या बैठकीला सहभागी होण्यासाठी विशेष निमंत्रण पाठवले होते. जी-७ देशांचे संमेलन ब्रिटनमधील कॉर्नवॉल येथे ११ जून ते १३ जूनदरम्यान आयोजित होणार आहे. जी-७ देशांमध्ये कॅनडा, फ्रान्स, जर्मनी, इटली, जपान, ब्रिटन आणि अमेरिका या देशांचा समावेश आहे.