लैंगिक छळामुळे मुलीची आत्महत्या, मृत्यूपूर्वी लिहिलेल्या चिठ्ठीत म्हणाली...

चेन्नई : तमिळनाडूतील करूर येथे १७ वर्षीय मुलीने गळफास घेऊन आत्महत्या केली. लैंगिक छळाला कंटाळून आपण आत्महत्या करीत असल्याचे तिने मृत्यूपूर्वी लिहिलेल्या चिठ्ठीत म्हटले आहे.

ही मुलगी इयत्ता १२ वीत होती. शुक्रवारी सायंकाळी ती शाळेतून घरी आली. तिची विधवा आई घरी नव्हती. तेव्हा तिने गळफास घेतला. शेजारच्या एका ज्येष्ठ महिलेला तिचा मृतदेह लटकलेल्या अवस्थेत आढळून आला.

मुलीने मागे ठेवलेल्या चिठ्ठीत लिहिले की, लैंगिक छळामुळे आत्महत्या करणारी मी करूर जिल्ह्यातील शेवटची मुलगी ठरले पाहिजे. मला आत्महत्येचा निर्णय घेण्यास भाग पाडणाऱ्याचे नाव घ्यायला मी घाबरत आहे. मला खूप जगायचे होते आणि इतरांना मदत करायची होती.