ट्रक आणि बसचा भीषण अपघात; 4 जणांचा मृत्यू तर, 24 पेक्षा जास्त प्रवासी जखमी

अपघाताची माहिती मिळताच पोलिसांनी घटनास्थळी धाव घेत मदत आणि बचावकार्य सुरू केले.

जयपूर:राजस्थानच्याजयपूरमध्ये ट्रक आणि बसचा एक भीषण अपघात झाला आहे. जयपूरच्या बस्सी परिसरात ट्रक आणि बसची जोरदार धडक झाली. या अपघातात चार जणांचा मृत्यू झाला असून दोन डझनहून अधिक प्रवासी जखमी झाले आहेत. अपघाताची माहिती मिळताच पोलिसांनी धाव घेत तपास सुरू केला.

मिळालेल्या माहितीनुसार, एका प्रवासी बसने पाठीमागून ट्रकला जोरदार धडक दिली. ही धडक इतकी भीषण होती की बसमध्ये बसलेले 24 पेक्षा अधिक प्रवासी जखमी झाले. अपघातानंतर जखमींना तातडीने रुग्णालयात दाखल करण्यात आले. त्यांच्यावर सध्या उपचार सुरू आहेत. तर, दुर्दैवाने या अपघातात 4 जणांचा मृत्यूही झाला आहे. पोलिसांनी या सर्वांचे मृतदेह पोस्टमॉर्टमसाठी पाठवले आहेत.

जयपूर-आग्रा महामार्गावर जाम

या अपघातानंतर जयपूर-आग्रा महामार्गावर बराच वेळ जाम झाला होता. अपघाताची माहिती मिळताच बस्सी, कानोटा आणि तुंगा पोलीस ठाण्याचे पोलीस घटनास्थळी पोहोचले आणि त्यांनी मदत आणि बचावकार्य सुरू केले. पोलिस व ग्रामस्थांनी बसच्या काचा फोडून प्रवाशांना बाहेर काढले. त्यानंतर चार रुग्णवाहिका आणि खासगी वाहनांच्या मदतीने जखमींना बस्सी सीएचसी आणि एसएमएस हॉस्पिटलमध्ये पाठवण्यात आले.