डॉक्टरकडून रुग्णाला बेदम मारहाण, व्हिडीओ सोशल मीडियावर व्हायरल

सोशल मीडियावर व्हायरल झालेल्या व्हिडीओमध्ये सवाई मानसिंह मेडिकल कॉलेज रुग्णालयात उपचारासाठी दाखल झालेल्या एका रुग्णाला डॉक्टर बेडवर चढून बेदम मारहाण करत असल्याचं दिसत आहे.

ठळक मुद्देरुग्णालयात उपचारासाठी आलेल्या एका रुग्णाला डॉक्टरने बेदम मारहाण केली आहे. राजस्थानमधील जयपूरच्या प्रसिद्ध सवाई मानसिंह मेडिकल कॉलेजमध्ये ही घटना घडलीमानवाधिकार आयोगाने रुग्णालय प्रशासनाला 25 जूनपर्यंत अहवाल सादर करण्याचे आदेश दिले आहेत.

जयपूर - संतप्त झालेल्या रुग्णांच्या नातेवाईकांनी बहुतांश वेळा रुग्णालयाची तोडफोड केल्याच्या तसेच डॉक्टरांना मारहाण केल्याच्या अनेक घटना समोर येत असतात. मात्र जयपूरमधील एका रुग्णालयात याउलट एक घटना घडली आहे. रुग्णालयात उपचारासाठी आलेल्या एका रुग्णाला डॉक्टरने बेदम मारहाण केली आहे. राजस्थानमधील जयपूरच्या प्रसिद्ध सवाई मानसिंह मेडिकल कॉलेजमध्ये ही घटना घडली असून या घटनेचा एक व्हिडीओ सोशल मीडियावर जोरदार व्हायरल होत आहे. 

सोशल मीडियावर व्हायरल झालेल्या या व्हिडीओमध्ये सवाई मानसिंह मेडिकल कॉलेज रुग्णालयात उपचारासाठी दाखल झालेल्या एका रुग्णाला डॉक्टर बेडवर चढून बेदम मारहाण करत असल्याचं दिसत आहे. या प्रकरणी मानवाधिकार आयोगाने रुग्णालय प्रशासनाला 25 जूनपर्यंत अहवाल सादर करण्याचे आदेश दिले आहेत. रुग्णालय प्रशासनाने दिलेल्या माहितीनुसार, जयपूरमधील चांदपोल बाजार परिसरातील रहिवासी मुबारिक (30) याला 1 जूनला उपचारासाठी रुग्णालयात दाखल करण्यात आलं होतं. 

मुबारिक विषारी औषध प्यायला होता. तसेच तो पोटाच्या विकाराने आजारी असल्याने त्याच्यावर रुग्णालयातील डॉक्टर काही दिवसांपासून उपचार करत होते. उपचारासाठी आवश्यक असणाऱ्या काही वैद्यकीय तपासण्यांसाठी त्याच्या रक्ताचे नमुने घेण्यासाठी महिला डॉक्टर गेल्या असता रुग्ण हिंसक झाला. त्याने डॉक्टरला मारहाणही केली. तिथे उपस्थित अन्य एक पुरुष डॉक्टर आणि नातेवाईकांनी मध्यस्थी करण्याचा प्रयत्न केला. पण त्यांनाही रुग्णाने मारहाण केली. 

#WATCH: A resident doctor beat up a patient in Sawai Man Singh (SMS) Medical College in Jaipur, Rajasthan, yesterday. Raghu Sharma, Medical & Health Minister of Rajasthan says,' We have asked for a report on the video as to what really happened.' pic.twitter.com/9mU97nwif2

— ANI (@ANI) June 3, 2019

रुग्णालयाचे अधीक्षक डॉ. डी. एस. मीणा यांनी 'सोशल मीडियावर व्हायरल झालेल्या व्हिडिओमध्ये फेरफार झाल्याची शक्यता आहे. रुग्णालयातील समिती या घटनेची चौकशी करणार आहे. त्यानंतर त्याचा अहवाल राजस्थान मानवाधिकार आयोगाला पाठवण्यात येईल' अशी माहिती दिली आहे. तसेच रुग्णावर योग्य उपचार करण्यात आले असून लवकरच त्याला रुग्णालयातून डिस्चार्ज देण्यात येईल असंही मीणा यांनी म्हटलं आहे. या प्रकरणी मानवाधिकार आयोगाने रुग्णालय प्रशासनाला 25 जूनपर्यंत अहवाल सादर करण्याचे आदेश दिले आहेत. सोशल मीडियावर रुग्णालयातील मारहाणीचा व्हिडीओ व्हायरल झाल्यानंतर ही घटना समोर आली आहे.