'मी दोघांचीही पत्नी! राहणार त्याच्याच सोबत, ज्याच्या सोबत...', पाकमधून परतलेल्या अंजूची 'दिल की बात'

नसरुल्लाह संदर्भात बोलताना अंजू म्हणाली, त्यांनी मला एक्सेप्ट केले आहे. तर माझ्या मुलांचाही स्वीकार केला आहे.

सोशल मीडियावर झालेल्या मैत्रीनंतर, पाकिस्तानातील प्रियकर नसरुल्लाह सोबत लग्न करून फातिमा झालेली अंजू आता भारतात परतली आहे. ती येथे आल्यापासून तिच्या संदर्भात अनेक प्रश्न निर्माण झाले आहेत. जसे की, ती पाकिस्तानची गुप्तहेर तर बनून आली नाही ना? आता ती तिच्या पहिल्या पतीसोबत आणि मुलांसोबत राहणार, की पुन्हा तिच्या पाकिस्तानातील पतीकडे परत जाणार? आदी...

इंडिया टुडेसोबत बोलताना अंजूने अनेक प्रश्नांवर मोकळेपणानं उत्तरं दिली आहेत. या मुलाखतीत अंजूने म्हटले आहे की, ती सध्या तिच्या मुलांसोबत राहत आहे. याच वेळी तिने तिच्या पहिल्या पतीसोबत अर्थात अरविंद कुमारसोबत राहत नसल्याचे स्पष्ट केले. तिचा पहिला पती अरविंद भिवाडी येथे असून ती मुलांसह दिल्ली जवळ राहत आहे.

'मी दोघांचीही पत्नी...' -
फातिमा झालेल्या अंजूने एका प्रश्नाला उत्तर देताना म्हटले आहे की, "मी दोघांचीही पत्नी आहे आणि राहणार त्याच्याच सोबत ज्याच्या सोबत मनापासून लग्न केले आहे. सध्या कायदेशीरपणे मी अरविंदचीही पत्नी आहे आणि तिकडे निकाह केला आहे. त्यामुळे त्यांचीही पत्नी आहे. तसेच मी घटस्फोटासाठी अद्याप कसल्याही प्रकारचा अर्ज केलेला नाही. पुढे मुलांच्या भविष्याचा विचार करून निर्णय घेतला जाईल."

'...तर नसरुल्लाह भारतात येईल' -
नसरुल्लाह संदर्भात बोलताना अंजू म्हणाली, त्यांनी मला एक्सेप्ट केले आहे. तर माझ्या मुलांचाही स्वीकार केला आहे. जर मुलं पाकिस्तानात जाण्यासाठी तयार झाले तर, त्यांना तेथे घेऊन जाईल. मात्र, जर ते तयार झाले नाही, तर नसरुल्लाह भारतात येईल.