राजकीय स्तरावर माझा वापर केला जातोय - रॉबर्ट वाड्रा

राजकीय स्तरावर काही लोक माझा वापर करत असल्याचा आरोप सोनिया गांधी यांचे जावई रॉबर्ट वाड्रा यांनी आज केला.

ऑनलाइन लोकमत

नवी दिल्ली, दि. २२ - राजकीय स्तरावर काही लोक माझा वापर करत असल्याचा आरोप सोनिया गांधी यांचे जावई आणि प्रियंका गांधीचे पती रॉबर्ट वाड्रा यांनी  केला. मी कोणत्याही चुकीच्या पद्धतीने व्यवहार केले नाहीत, सर्व काही कायदेशीर व्यवहार केले आहेत. मग इतर व्यवसायिकाप्रमाणेच माझ्याशी का बोललं जात नाही? असा सवाल करत माझा राजकीय पटलावर वापर केला जात आहे असे म्हणाले.

वाड्रा यांनी सांगितले की, माझ्याविषयी लोकांमध्ये इतका नकारात्मक प्रचार करण्यात आला आहे की सत्य त्यांच्यासाठी काहीच महत्वाचे राहिले नाही. हरियाणा आणि राजस्थानमध्ये त्यांच्या उद्योगाची चौकशी करण्याबरोबरच त्यांच्या कंपनीला ईडीकडून नोटीस पाठविण्यात आली आहे. त्यावर बोलताना ते म्हणाले की, स्पष्ट रुपाने हा राजकीय बदला आहे. लोकांचे लक्ष भटकाविण्यासाठी ते माझा एखाद्या शस्त्रासारखा वापर करत आहेत. 

भाजपा शासित हरियाणा आणि राजस्थानमधील जमीनी खरेदी विक्रीच्या प्रकरणावरून प्रियांका गांधींचे पती रॉबर्ट वाड्रा अडचणीत आले होते, त्यांच्यावर एक भूखंड काही लाखांत खरेदी करून वर्षभरात काही कोटींना अस्तित्वात नसलेल्या कंपनीला विकल्याचा आरोप झालेला आहे. 

रॉबर्ट वाड्रा यांच्या कंपनीने बिकानेरमधला एक भूखंड ७९ लाख रुपयांना खरेदी केला आणि वर्षभरात तो दुस-या कंपनीला ५.४४ कोटी रुपयांना विकला आहे असा आरोप भारतीय जनता पार्टीचे नेते संबित पात्रा यांनी त्यांच्यावर केला होता.