रुग्णालयात बेडवर पाय ठेवून रुग्णाशी बोलणा-या आयएएस अधिका-याचा फोटो व्हायरल
By लोकमत न्यूज नेटवर्क | Published: May 5, 2016 09:27 AM2016-05-05T09:27:26+5:302016-05-05T11:13:29+5:30
रुग्णालयात आजारी मुलाच्या आईशी बोलताना बेडवर पाय ठेवून उभ्या असलेल्या आयएएस अधिका-याचा फोटो सोशल मिडियावर सध्या व्हायरल होऊ लागला आहे
रुग्णालयात बेडवर पाय ठेवून रुग्णाशी बोलणा-या आयएएस अधिका-याचा फोटो व्हायरल
Next
रायपूर, दि. 05 - रुग्णालयात आजारी मुलाच्या आईशी बोलताना बेडवर पाय ठेवून उभ्या असलेल्या आयएएस अधिका-याचा फोटो सोशल मिडियावर सध्या व्हायरल होऊ लागला आहे. छत्तीसगडमधील हा आयएएस अधिकारी या फोटोमध्ये महिलेशी बोलताना दिसत आहे. यावेळी ती महिला बेडवर बसली असताना हा अधिकारी मात्र त्याच बेडच्या लोखंडी दांड्याला पाय लावून उभा असल्याचं दिसल्याने फक्त नावासाठी ही चर्चा करत होते का ? असा सवाल सोशल मिडियामधून विचारला जात आहे.
या अधिका-याचं नाव जगदीश सोनकर आहे. 2013च्या बॅचमधील आयएएस अधिकारी असून आश्चर्याची गोष्ट म्हणजे त्यांच्याकडे मेडिकल डिग्रीदेखील आहे. बलरामपूर जिल्ह्यातील रामानागुंजमध्ये उपविभागीय दंडाधिकारी पदावर ते कार्यरत आहेत. कुपोषणग्रस्त मुलांच्या आईंशी चर्चा करण्यासाठी आणि पाहणी करण्यासाठी जगदीश सोनकर सरकारी रुग्णालयात गेले होते.
या रुग्णालयात कुपोषित मुलांवर उपचार करण्यात येत आहेत. यावेळी एका मुलाच्या आईशी बोलताना जगदीश सोनकर यांचा काढलेला हा फोटो सोशल मिडियावर व्हायरल झाला आहे. या रुग्णालयात मुलांना व्यवस्थित उपचार मिळावा यासाठी प्रयत्न केले जातात. मात्र प्रशासनातील व्यक्तीच्या या अशा वागण्याने त्यांच्या गंभीरतेवर प्रश्नचिन्ह उपस्थित केले जात आहे. सोशल मिडियावर फोटो व्हायरल झाल्यानंतर जगदीश सोनकर यांनी माफी मागितली आहे.
