Income Tax Raid: 350 कोटी रुपयांची टॅक्स चोरी; आयकर विभागाचे गुजरात-मुंबईत धाडसत्र

Income Tax Raid: शाह पेपर उद्योगावर 350 कोटी रुपयांच्या टॅक्स चोरीचा आरोप आहे.

Income Tax Raid: आयकर विभागाने मंगळवारी वापी उद्योग नगर येथील शाह पेपर मिलच्या युनिटसह मुंबईतील कार्यालय आणि व्यवस्थापकांच्या निवासस्थानासह एकूण 18 ठिकाणी छापे टाकले. या कंपनीवर 350 कोटी रुपयांच्या टॅक्स चोरीचा आरोप आहे. छाप्यादरम्यान आयकर विभागाच्या पथकाला 2 कोटी रुपये रोख आणि 2 कोटी रुपयांचे दागिने सापडले आहेत. गेल्या 6-7 वर्षांत बनावट तोटा दाखवून कर चुकवल्याचा आरोप कंपनीवर आहे.

आयकर विभागाने सांगितले की, छाप्यादरम्यान 2.25 कोटी रुपये रोख, 2 कोटी रुपयांचे दागिने, कर्ज आणि लेजरसह खरेदी-विक्रीची कागदपत्रे जप्त करण्यात आली आहेत. कागदपत्रांची तपासणी पूर्ण झाल्यानंतर करचोरी उघड होईल. याआधीही आयकर विभागाच्या पथकाने छापा टाकला होता. आर्थिक वर्ष सुरू होताच वापी येथील उद्योग नगर येथील शाह पेपरमिलमध्ये काही बेनामी व्यवहार होत असल्याच्या संशयावरून सुरत आयुक्तालयाच्या नेतृत्वाखाली छापा टाकण्यात आला. 15 हून अधिक वेगवेगळ्या ठिकाणी छापे टाकण्यात आले. त्यासाठी पूर्वतयारीही करण्यात आली होती.

वापीमध्ये या ग्रुपचे एकूण तीन युनिट्स आहेत. यामध्ये नुकतेच एक युनिट बंद करण्यात आले आहे. या ग्रुपच्या दोन युनिट्स आणि सारीगमचे संचालक आणि त्याच्या दोन साथीदारांच्या निवासस्थानीही शोधमोहीम राबवण्यात आली. करचुकवेगिरीच्या आरोपानंतर शिक्षणविश्वातही शहा पेपर मिलची चर्चा सुरू झाली आहे. कारण 32 हजार मेट्रिक टन कागद खरेदीसाठी राज्य पाठ्यपुस्तक मंडळाने जारी केलेल्या निविदेतही हेच नाव आहे. येत्या काही दिवसांत आणखी कंपन्याही पकडल्या जाण्याची शक्यता आहे.