मोदींना हवाई हद्द नाकारणाऱ्या पाकिस्तानविरोधात भारत आंतरराष्ट्रीय पातळीवर जाणार

पंतप्रधान नरेंद्र मोदी यांच्या अरेबिया दौऱ्यासाठी भारताने पाकिस्तानकडे हवाई हद्दीची परवानगी देण्याची विनंती केली होती. मात्र पाकिस्तानकडून ती नाकारण्यात आली होती.

नवी दिल्ली: पंतप्रधान नरेंद्र मोदी यांच्या अरेबिया दौऱ्यासाठी भारताने पाकिस्तानकडे हवाई हद्दीची परवानगी देण्याची विनंती केली होती. मात्र पाकिस्तानकडून ती नाकारण्यात आली होती. पाकिस्तानच्या या निर्णयाविरुद्ध आता भारत आंतरराष्ट्रीय नागरी वाहतूक संघटनेकडे उपस्थित करणार असल्याची माहिती समोर आली आहे.

पाकिस्तान मीडियाने दिलेल्या माहितीनुसार, पाकिस्तानचे परराष्ट्र मंत्री शाह महमूद कुरैशी यांनी रविवारी सांगितले की, "पंतप्रधान नरेंद्र मोदी यांच्या सौदी अरेबिया दौऱ्यासाठी त्यांच्या विमानाला पाकिस्तानच्या हवाई हद्दीची परवानगी मिळावी, यासाठी विनंती करण्यात आली होती. मात्र, भारताची ही विनंती फेटाळण्यात आली असल्याचे सांगितले होते. यानंतर भारताकडून हा विषय आंतरराष्ट्रीय नागरी हवाई वाहतूक संघटनेकडे नेणार असल्याचे समोर आले आहे. आंतरराष्ट्रीय नागरी हवाई वाहतूक संघटनेने आखून दिलेल्या मार्गदर्शक तत्त्वांनुसार हवाई हद्द वापरण्याची परवानगी मागितल्यानंतर ती उपलब्ध करून देण्यात येते. 

पाकिस्ताने याआधीही पंतप्रधान मोदींच्या दौऱ्यासाठी हवाई हद्दीची परवानगी नाकारली होती. त्यावेळी नरेंद्र मोदी अमेरिका दौऱ्यावर जाणार असल्याने भारताकडून पाकिस्तानला या दौऱ्यासाठी हवाई हद्दीची परवानगी मिळण्यासाठी रितसर विनंती करण्यात आली होती. मात्र पाकिस्तानने भारताची ही विनंती फेटाळत नरेंद्र मोदींच्या दौऱ्यासाठी पाकिस्तानचा हवाई मार्ग खुला करण्यास नकार दर्शविला होता.
दरम्यान, सौदी अरेबियात 29 ऑक्टोबरला होणाऱ्या एका संमेलनासाठी पंतप्रधान नरेंद्र मोदी जाणार आहेत. तर पाकिस्तानचे पंतप्रधान इम्रान खान सुद्धा या संमेलनात भाग घेण्यासाठी 28 ऑक्टोबरला सौदी अरेबियाला जाणार आहेत.