आयफोन 7च्या बॅटरीचा स्फोट, आग लागून कारचे नुकसान
By admin | Published: October 22, 2016 01:20 PM2016-10-22T13:20:07+5:302016-10-22T14:45:51+5:30
सॅमसंग गॅलॅक्सी नोट ७ प्रमाणे आता अॅपलच्या आयफोन ७ ला ही आग लागल्याचे एक प्रकरण समोर आले आहे.
Next
ऑनलाइन लोकमत
सिडनी, दि. २२ - सॅमसंग गॅलॅक्सी नोट ७ प्रमाणे आता अॅपलच्या आयफोन ७ ला ही आग लागल्याचे एक प्रकरण समोर आले आहे. ऑस्ट्रेलियात न्यू साऊथ वेल्समध्ये ही घटना घडली. मॅट जोन्स यांनी आयफोन ७ च्या स्फोटामुळे आपल्या गाडीला आग लागल्याचा दावा केला आहे.
' 7 News'ने दिलेल्या वृत्तानुसार मॅट जोन्स त्यांची गाडी न्यू साऊथ वेल्सच्या रस्त्यावर पार्क करुन फिरण्यासाठी म्हणून बाहेर पडले. बाहेर निघताना त्यांनी आयफोन ७ एका कपडयामध्ये गुंडाळून ठेवला होता. जेव्हा ते फिरुन आले तेव्हा त्यांना गाडीमधून धूर येताना दिसला. कपडयामध्ये गुंडाळलेला आयफोन ७ जळत होता. आयफोन ७ मुळे आग लागून आपल्या गाडीच्या इंटीरीयरचे नुकसान झाल्याचा त्यांचा आरोप आहे.
आणखी वाचा
ज्या कापडात आयफोन ७ ठेवला होता ते कापड उघडले असता आत ठेवलेला फोन पूर्णपणे वितळल्याचे दिसून आले, असे जोन्स यांनी ७ न्यूजशी बोलताना सांगितले. अॅपलच्या या बहुचर्चित फोनबद्दल यापूर्वीही अनेक तक्रारी आल्या आहेत. अॅपलला या घटनांची पूर्ण माहिती असून, अशा प्रकारे अचानक फोन पेट घेण्याच्या घटना कशामुळे घडत आहेत त्याचा अॅपल तपास करत आहे.
आयफोनला आग लागण्याची ही काही पहिलीच वेळ नाही. यापूर्वी सप्टेंबर महिन्यातही आयफोन ७ प्लसचा स्फोट झाल्याचे वृत्त होते. याआधी सॅमसंगच्या गॅलॅक्सी नोट ७ या स्मार्टफोनलाही खराब बॅटरीमुळे आग लागल्याच्या अनेक घटना घडल्या आहेत. इतकी महागडी वस्तू घेऊनही सुरक्षा मिळत नसेल तर काय उपयोग असा युझरचा सवाल आहे.