Jawed Habib: हेअरकट करताना जावेद हबीब केसात थुंकला, महिलेचा आरोप; Video व्हायरल झाल्यावर मागितली माफी

Jawed Habib Viral Video: प्रसिद्ध हेअरस्टायलिस्ट जावेद हबीबचा एक व्हिडीओ सोशल मीडियावर व्हायरल झाला आहे, ज्यात तो महिलेच्या केसात थुंकताना दिसत आहे.

Jawed Habib Viral Video: प्रसिद्ध हेअरस्टायलिस्ट जावेद हबीबचा एक व्हिडीओ सध्या सोशल मीडियावर (Social Media) व्हायरल होत आहे. व्हिडीओमध्ये तो एका महिलेचे केस कापताना (Hair Cutting) दिसत आहे. पण, हा व्हिडीओ व्हायरल होण्याचे कारण म्हणजे जावेद हबीबचे केस कापताना केलेले विचित्र कृत्य. जावेद हबीबने केसात थुंकल्याचा आरोप महिलेने केला आहे. दरम्यान, हा व्हिडीओ व्हायरल झाल्यानंतर त्यानं माफी मागितली आहे. जावेद हबीबनं इन्स्टाग्रामवर (Instagram) एक व्हिडीओ शेअर करत मनापासून माफी मागत असल्याचं म्हटलं.

दरम्यान, जावेद हबीबनं माफी मागताना थुंकण्याबद्दल वक्तव्य टाळलं, तसंच आपल्या काही शब्दांमुळे कोणी दुखावलं गेलं असेल तर त्यावर आपण माफी मागतो असं म्हटलं. "आमच्या सेमिनारमध्ये काही शब्दांमुळे लोकं दुखावली गेली आहेत. आमचे जे सेमिनार असतात ते प्रोफेशनल असतात हे मी सांगू इच्छितो. म्हणजेच आम्ही जे काम करतो त्याचा यात समावेश असतो, अनेकदा त्यांचा कालावधीही मोठा असतो. यासाठीच आम्हाला ह्युमरस बनावं लागतं. परंतु जर कोणी दुखावलं गेलं असेल तर माफ करावं," असं तो व्हिडीओमध्ये म्हणताना दिसतोय.

काय आहे प्रकरण ?
व्हिडीओमध्ये दावा केला जात आहे की जावेद हबीब केस कापताना पाण्याऐवजी केसात थुंकला. रिशी बग्री नावाच्या ट्विटर युझरने हा व्हिडीओ पोस्ट केला आहे. हा व्हिडीओ सोशल मीडियावर व्हायरल झाल्यानंतर जावेद हबीबवर जोरदार टीका करण्यात आली होती. तर, हा व्हिडीओ व्हायरल झाल्यानंतर महिलेची प्रतिक्रियाही समोर आली होती.

For those who goes to Javed Habib's saloon pic.twitter.com/dblHxHUBkw

— Rishi Bagree (@rishibagree) January 5, 2022

काय म्हणाली महिला?
"माझे नाव पूजा गुप्ता आहे. माझे बरौत शहरात वंशिका ब्युटी पार्लर नावाचे पार्लर आहे. काल मी जावेद हबीब सरांच्या सेमिनारला गेले होते. तिथे त्यांनी मला केस कापण्यासाठी स्टेजवर बोलावले. यावेळी त्यांनी माझ्यासोबत गैरवर्तन केले. पाणी नसेल तर थुंकूनही केस कापता येतात, असं दाखवून दिलं. मी तो हेअरकट केला नाही, यापुढे मी रस्त्यावर केस कापून घेईन पण, जावेद हबीबकडून नाही," असं ती महिला शेअर केलेल्या व्हिडीओत म्हणताना दिसत आहे.