पत्रकार परिषदेत कपिल मिश्रा पडले बेशुद्ध

नवी दिल्ली, दि. 14 - दिल्लीचे मुख्यमंत्री अरविंद केजरीवाल यांनी मंत्रीमंडळातून बडतर्फ केलेले मंत्री कपिल मिश्रा आज सकाळी पत्रकार परिषदेतच बेशुद्ध पडले.  गेल्या 5 दिवसांपासून ते केजरीवालांविरोधात उपोषणाला बसले आहेत. अशक्तपणामुळे त्यांना चक्कर आल्याची शक्यता आहे. मिश्रांना सध्या रूग्णालयात दाखल करण्यात आलं आहे. पण चक्कर येणापूर्वी त्यांनी अरविंद केजरीवाल आणि आम आदमी पक्षावर पुन्हा गंभीर आरोप लावले. तसेच अरविंद केजरीवाल यांना थोडी जरी लाज वाटत असेल तर त्यांनी आज संध्याकाळपर्यंत राजीनामा द्यावा. जर त्यांनी राजीनामा नाही दिला तर मी त्यांची कॉलर धरून त्यांना तिहार तुरुंगात टाकेन. तशी शपथ मी घेतली आहे असं त्यांनी ठणकावलं. 

 

केजरीवाल यांनी बनावट कंपन्यांच्या नावाने देणग्या वसूल केल्याचा त्यांनी आरोप केला.  केजरीवालांनी देशाचा विश्वासघात केला आहे. पक्षासाठी बनावट कंपन्यांच्या नावाने देणग्या वसूल केल्या तसेच पैशाची गरज नसतानाही लोकांकडून 10-10 रूपये वसूल करण्यात आले, त्यासाठी बनावट कंपन्या स्थापन करण्यात आले. तसेच नोटबंदीच्या काळातही काळा पैसा पांढरा केला जात होता. अधिकाधिक बँक खाते अॅक्सिस बँकेतील असून याच खात्यातील पैसा नोटबंदीच्या काळात पांढरा केला जात होता आणि त्यांनी निवडणूक आयोगाला चुकीची माहिती दिली असं ते म्हणाले. 

 

 

दिल्लीतील मंत्री सत्येंद्र जैन यांनी दिल्लीचे मुख्यमंत्री अरविंद केजरीवाल यांना 2 कोटी रूपये दिले असा सनसनाटी आरोप करून कपिल मिश्रांनी आज दिल्लीच्या राजकारणात खळबळ उडवून दिली होती. जैन हे केजरीवालांच्या मंत्रिमंडळात मंत्री आहेत. दुसरीकडे आपने त्यांचे सर्व आरोप फेटाळले आहेत.  यावर प्रतिक्रिया देताना सिसोदिया म्हणाले, कपिल मिश्रांनी केलेले आरोप अत्यंत खालच्या दर्जाचे असून हे सर्व आरोप निराधार आहे. प्रतिक्रिया देण्यासारखे हे आरोप नाही असे सिसोदिया यांनी म्हटले आहे.  त्यांनी केलेले आरोप हे पूर्णपणे बिनबुडाचे असून कोणत्याही आधाराशिवाय हे आरोप करण्यात आल्याचं ते म्हणाले. मात्र, मिश्रा यांच्या या आरोपांमुळे दिल्लीच्या राजकीय वर्तुळात खळबळ उडाली आहे. 

   

शनिवारी दिल्लीतील मंत्रिमंडळातून कपिल मिश्रा यांची हकालपट्टी करण्यात आली होती. रविवारी सकाळी कपिल मिश्रा यांनी दिल्लीचे नायब राज्यपाल अनिल बैजल यांची भेट घेतली. राज्यपालांच्या भेटीनंतर कपिल मिश्रा यांनी पत्रकारांशी संवाद साधताना केजरीवाल यांच्यावर आरोप केले. ‘परवा रात्री दिल्लीचे मंत्री सत्येंद्र जैन यांनी अरविंद केजरीवाल यांना माझ्यासमोर दोन कोटी रुपये दिले. हा प्रकार बघून मला रात्रभर झोप आली नाही’ असे कपिल मिश्रांनी सांगितले. मी हे पैसे कशासाठी दिले याची विचारणा केजरीवालांकडे केली. पण त्यांनी यावर ठोस उत्तर देणे टाळले असा दावा त्यांनी केला. तसेच मी भ्रष्टाचारविरोधी पथकाला पत्र लिहिल्यानं मला हटवण्यात आलं असं ते म्हणाले.

 

याशिवाय केजरीवाल यांच्या एका नातेवाईकासाठी 50 कोटी रुपयांचं "डील" केल्याचं सत्येंद्र जैन यांनी आपल्याला सांगितलंय, असा गौप्यस्फोट त्यांनी केला. या गंभीर आरोपांमुळे दिल्लीच्या राजकीय वर्तुळात खळबळ उडाली आहे. हे पैसे कुठून आले आणि कशासाठी देण्यात आले याची चौकशी झाली पाहिजे अशी मागणीही त्यांनी केली आहे.