...तुमचाही कलबुर्गी करु - गिरीश कर्नाड यांना धमकी
By Admin | Published: November 12, 2015 12:39 PM2015-11-12T12:39:14+5:302015-11-12T12:39:25+5:30
बेंगळुरु विमानतळाला टिपू सुलतान यांचे नाव देण्याची मागणी करणारे नाटककार व दिग्दर्शक गिरीश कर्नाड यांना जीवे ठार मारण्याची धमकी देण्यात आले आहे.
ऑनलाइन लोकमत
बेंगळुरु, दि. १२ - टिपू सुलतान हिंदू असते तर त्यांना शिवाजी महाराजांप्रमाणे सन्मान मिळाल असता असे सांगत बेंगळुरु विमानतळाला टिपू सुलतान यांचे नाव देण्याची मागणी करणारे नाटककार व दिग्दर्शक गिरीश कर्नाड यांना जीवे ठार मारण्याची धमकी देण्यात आले आहे.
कर्नाटकमध्ये सध्या टिपू सुलतान जयंतीचा वाद चांगलाच चिघळला आहे. हिंदूत्ववादी संघटनांनी जयंती साजरी करण्याच्या कर्नाटक सरकारच्या निर्णयाला विरोध दर्शवला आहे. कर्नाटक सरकारच्या एका कार्यक्रमात गिरीश कर्नाड यांनी बेंगळुरु विमानतळला टिपू सुलतान यांचे नाव देण्याची मागणी केली होती. या विधानानंतर गिरीश कर्नाड यांच्यावर भाजपासह अन्य हिंदूत्ववादी संघटनांनी टीकेची झोड उठवली आहे.
ट्विटरवर इनटॉलरंट चंद्र नामक युजरने गिरीश कर्नाड यांना ठार मारण्याची धमकी दिली. 'जर बेंगळुरु विमानतळाला केंपेगौडाऐवजी टिपू सुलतान यांचे नाव देऊन कन्नड जनतेच्या भावना दुखावल्या तर तुमचाही कलबुर्गींप्रमाणेच अंत होईल' असे या ट्विटमध्ये म्हटले होते. पोलिसांनी या ट्विटची दखल घेतली असून सध्या हे ट्विट डिलीटही करण्यात आले आहे. दरम्यान, या विधानावर वाद सुरु होताच कर्नाड यांनी माफी मागितली आहे.