महाराष्ट्रातील भाजपाच्या 16 उमेदवारांची यादी जाहीर

आगामी लोकसभा निवडणुकीच्या प्रचाराला वेग आलेला असताना आज भारतीय जनता पार्टीने आपल्या लोकसभा उमेदवारांची यादी जाहीर केली आहे.

नवी दिल्ली - आगामी लोकसभा निवडणुकीच्या प्रचाराला वेग आलेला असताना आज भारतीय जनता पार्टीने आपल्या लोकसभा उमेदवारांची यादी जाहीर केली आहे. भाजपाच्या केंद्रीय निवडणूक समितीने या नावांची घोषणा केली आहे. या यादीमध्ये भाजपाच्या ज्येष्ठ नेत्यांचा समावेश करण्यात आला आहे. यामध्ये पंतप्रधान नरेंद्र मोदी आणि पक्षाध्यक्ष अमित शहा यांच्या नावासोबत नितीन गडकरी, राजनाथ सिंह, स्मृती इराणी अशा दिग्गज भाजपा नेत्यांची उमेदवारी जाहीर करण्यात आली आहे.

Shri @rajnathsingh to contest Lok Sabha elections 2019 from Lucknow and Shri @nitin_gadkari to contest Lok Sabha elections 2019 from Nagpur. https://t.co/3V9yQGiCJL

— BJP (@BJP4India) March 21, 2019

या यादीमध्ये बहुतांश विद्यमान खासदारांना पुन्हा संधी दिल्याचं पाहायला मिळालं, नागपूरमधून नितीन गडकरी, रावेरमधून एकनाथ खडसेंच्या सुनबाई रक्षा खडसे, जालना लोकसभा मतदारसंघातून भाजपा प्रदेशाध्यक्ष रावसाहेब दानवे, धुळे लोकसभा मतदारसंघातून डॉ. सुभाष भामरे, चंद्रपूर येथून हंसराज अहिर, नंदुरबारमधून डॉ. हिना गावित, अकोला लोकसभा मतदारसंघातून संजय धोत्रे, भिवंडीतून कपिल पाटील, उत्तर मुंबईतून गोपाळ शेट्टी, बीडमधून प्रीतम मुंडे, मुंबई पश्चिम मध्य मुंबईतून पूनम महाजन, वर्धा येथून रामदास तडस, चिमूरमधून अशोक नेते, सांगली येथून संजयकाका पाटील या विद्यमान खासदारांना भाजपाने पुन्हा संधी दिली आहे

 

तर अहमदनगर लोकसभा मतदारसंघातून विद्यमान खासदार दिलीप गांधी यांचा पत्ता कट करत याठिकाणी नुकताच भाजपामध्ये प्रवेश केलेले डॉ. सुजय विखे पाटील यांनी संधी देण्यात आली आहे. तर लातूर लोकसभा मतदारसंघाचे खासदार सुनिल गायकवाड यांच्याऐवजी सुधाकरराव श्रृंगारे यांना उमेदवारी जाहीर झाली आहे. 

ईशान्य मुंबई लोकसभा मतदारसंघातील उमेदवाराची घोषणा पहिल्या यादीत करण्यात आली नाही. या लोकसभा मतदारसंघातून केंद्रीय मंत्री पियूष गोयल लोकसभा निवडणूक लढवण्याची इच्छुक आहेत. ईशान्य मुंबईत सध्या भाजपाचे किरीट सोमय्या हे खासदार आहेत. सोमय्या यांच्या नावाला शिवसेनेने विरोध केला आहे त्यामुळे ईशान्य मुंबई लोकसभा मतदारसंघाचा या पहिल्या यादीत समावेश केलेला नाही.