IPLमधील अष्टपैलू क्रिकेटपटूवर प्रेम करायची मॉडेल तान्या सिंह? समोर येतेय धक्कादायक माहिती

Model Tanya Singh: सूरतमधील २८ वर्षीय मॉडेल तान्या सिंह हिच्या संशयास्पद आत्महत्येमुळे खळबळ उडाली आहे. दरम्यान, या प्रकरणात अष्टपैलू क्रिकेटपटू अभिषेक शर्मा यांचं नाव समोर आलं आहे.

सूरतमधील २८ वर्षीय मॉडेल तान्या सिंह हिच्या संशयास्पद आत्महत्येमुळे खळबळ उडाली आहे. दरम्यान, या प्रकरणात अष्टपैलू क्रिकेटपटू अभिषेक शर्मा यांचं नाव समोर आलं आहे. कॉल डिटेल्स पाहिल्यानंतर तान्या हिने अभिषेक याच्याशीच सर्वार्धिक संभाषण केल्याचं समोर आलं आहे. त्याबरोबरच अभिषेक याला चौकशीसाठी सूरत येथे बोलावण्यात येणार असल्याची माहिती सूत्रांनी दिली आहे. 

सूरतमधील वेसू परिसरात राहणारी तान्या भवानी सिंह ही मूळची राजस्थानची आहे. तिचं कुटुंब वेसू येथील हॅप्पी एलिगेंस रेसिडेन्समध्ये राहते. तान्याचे वडील एका मिलमध्ये काम करायचे. तान्या मॉडेलिंग, फॅशन डिझायनिंग आणि इव्हेंट मॅनेजमेंट काम करत होती. रविवारी रात्री ती उशिरा घरी आली. त्यानंतर तिने आत्महत्या केली, असे सांगण्यात आले.  सकाळी तिचा मृतदेह गळफास घेतलेल्या स्थितीत सापडला.

कुटुंबीयांनी घटनेची माहिती पोलिसांना दिली. त्यानंतर तान्या हिचा मृतदेह सिव्हिल रुग्णालयात नेण्यात आले. पोलिसांनी सुरुवातीला आकस्मिक मृत्यूची नोंद केली आहे. या दरम्यान, पोलिसांनी मॉडेलच्या मोबाईल फोनची कॉल डिटेल्स, मेसेज आणि चॅटची सखोल पडताळणी केली. त्यामधून ती अनेक लोक आणि एका बड्या व्यक्तीच्या संपर्कात असल्याची माहिती समोर आली. आता या सर्वांना चौकशीसाठी बोलावण्याची तयारी पोलिसांनी केली आहे.

तान्याच्या फोनच्या तपासणीमधून ती रणजी क्रिकेटपटू आणि आयपीएलमधील अष्टपैलू खेळाडू अभिषेक शर्मा याच्या संपर्कात होती, अशी माहिती समोर आली आहे. दरम्यान, पोलिसांनी सांगितले की, तान्या हिच्या फोनच्या तपास करताना संशयास्पद क्रमांकावर फोन केले जात आहेत. तान्या ही अभिषेकच्या थेट संपर्कात होती किंवा नाही, हे तपासामधूनच समोर येणार आहे.

दरम्यान, तान्या हिने अभिषेक वर्मा याला तिच्या फोनमधून एकतर्फी मेसेज पाठवण्यात आले होते. या संदर्भात पोलिसांकडून अभिषेक याला कल्पना देण्यात आली आहे. त्याला चौकशीसाठी बोलवायचे की नाही याचा निर्णय येत्या काही दिवसांमध्ये घेतला जाणार आहे. एवढंच नाही तर तान्याच्या मोबाईलमध्ये काही क्रिकेटपटूंसोबत तिचे फोटोही सापडले आहेत. दरम्यान, तान्या ही कुठल्या तरी क्रिकेटपटूच्या प्रेमात पडली होती आणि जवळच्या नात्यामध्ये होती. सध्या पोलिसांनी गुन्हा नोंदवून तपासाला सुरुवात केली आहे.