मॉडेलिंगसाठी नरेंद्र मोदी देणार पंतप्रधानपदाचा राजीनामा

शुक्रवारचा दिवस उजाडलाच तो भारतातल्या अडव्हर्टायझिंग इंडस्ट्रीसाठी सुखद धक्का देत... पंतप्रधान नरेंद्र मोदी चक्क रिलायन्स जिओचे मॉडेल म्हणून टाइम्स ऑफ इंडिया व हिंदुस्थान टाइम्स या इंग्रजी वृत्तपत्रांच्या पहिल्या पानावर झळकले. सोशल मीडियावर याचे कायच्या काय पडसाद उमटले. कुणी म्हटलं, की मोदी आणि अंबानींचं साटंलोटं आहेच, कुणी म्हटलं एम्ब्लेमस अँड नेम्स अॅक्ट 1950 या कायद्याचा हा भंग आहे, कुणी म्हटलं की रिलायन्सनं पंतप्रधानांना चतुरपणे वापरून घेतलं तर कुणी म्हटलं सरकारी जाहिरातीत फक्त पंतप्रधान असायला हवेत, या कोर्टाच्या आदेशाबरहुकूम रिलायन्सनं हे पाउल उचललं कारण रिलायन्स स्वत:मध्ये नी सरकारमध्ये भेदच करत नाही.

पण, खरं काय आहे ते आमच्या दिल्लीतल्या सूत्रांनी सांगितलंय आणि त्यानुसार वर नमूद केलेली एकही बाब खरी नाहीये... खरी गोष्ट ही आहे की लवकरच नरेंद्र मोदी पंतप्रधानपदाचा राजीनामा देणार असून मॉडेलिंगमध्ये करीअर करणार आहेत. गुजरातच्या प्रमोशनसाठी कामाला आलेल्या व मोदींचे परमस्नेही असलेल्या अमिताभ बच्चन यांनीच मोदींना राजकारणापेक्षा मॉडेलिंगमध्ये कसं निर्धोक करीअर आहे हे स्वानुभवाचे दाखले देत पटवून दिलंय.

 

 

सूत्रांच्या सांगण्यानुसार पंतप्रधान होणं तेही बहुमतानं हा मोदींच्या राजकीय करीअरमधला परमोच्च बिंदू होता. यापुढे काही आता जाता येणं शक्य नाही. कारण, काही वर्षांनी इंग्लंडचे पंतप्रधान होऊ, मग अमेरिकेचे राष्ट्राध्यक्ष होऊ अशी काही सोय नाहीये तर भारतातच पुन्हा त्याच निवडणुका लढवाव्या लागतील. आणि तसं झालं तर, उलट, पुढच्या निवडणुकीत जागा घसरणार असल्याचेच अंदाज आहेत. ज्या गुजरातेतून मोदींनी दिल्लीत झेप घेतली, तो गुजरातही निसटत चाललाय. बिहार, पश्चिम बंगाल, केरळमध्ये सत्ता तर सोडाच लाजही राखता आली नाही. काश्मिरमध्ये अर्धवट सत्ता मिळाली, पण ती का मिळाली? असं वाटावं अशी काश्मिरची स्थिती आहे.

या सगळ्या पार्श्वभूमीवर नरेंद्र मोदींसारखा मुत्सद्दी माणूस भविष्याची तरतूद आत्तापासून करतील हेच त्यांचा इतिहास सांगतो. मोदी गुजरातचे तिसऱ्यांदा मुख्यमंत्री झाले, त्यावेळी त्यांनी हिंदीतून भाषण करत आपलं खरं लक्ष्य दिल्ली असल्याचं दाखवून दिलं होतं. म्हणजे, मुख्यमंत्रीपदाची निवडणूक त्यांनी पंतप्रधानपदावर डोळा देत लढवली. या सगळ्या पार्श्वभूमीवर आणि आमच्या सूत्रांच्या सांगण्यानुसार नरेंद्र मोदी लवकरच पंतप्रधानपदाचा अत्यंत रूबाबात राजीनामा देतील आणि भारतातलेच नव्हे तर जगातले सगळ्यात जास्त लोकप्रिय मॉडेल म्हणून नावलौकिक मिळवतील असा कयास आहे.